Parlamentario Endy Croes: Stichting Parkietenbos Aruba a reuni cu Comision Fiho den Parlamento

Parlamentario Endy Croes ta splica cu siman pasa tabata un siman cu un cantidad di reunion den cuadro di preparacionnan pa trata e ley di Serlimar. Asina a sinta cu entre otro AHATA, ATIA, KVK, Stichting Parkietenbos, gruponan di famia di Simeon Antonio pa nombra algun. Den e reunion cu Stichting Parkietenbos Aruba Parlamentarionan a scucha un historia basta amplio di e dump na Parkietenbos. Por a tuma nota cu e famianan cu ta biba den vecindario a informa Parlamento cu nan a sufri demasiado pa cu e dump na Parkietenbos y maneho di desperdicio cual a perhudica nan masha hopi. Molester di huma y musca na un manera insoportabel. Nan ta wordo exponi directamente na tur tipo di gas y ora biento bira esaki ta converti su mes den un situacion horibel. Den transcurso di mas di 30 aña esaki a causa daño nan grandi na nan salud. Hopi ta muchanan cu ta sufri di asma of a nace cu un of otro malesa. En realidad Parlamento tabata tin hopi atencion na testimonionan legitimo di esnan presente kendenan ta representa un grupo grandi di Simeon Antonio. Un cos ta sigur cu tur pero tur grupo y henter Aruba ta desea un solucion pa Parkietenbos. Parlamento di Aruba ta den preparacion pa trata e ley cual lo bay crea fondonan necesario pa por logra cera e dump na Parkietenbos y alabes traha un Sanitary Landfill nobo organisa y controla. Parlamento ta bezig studiando tur documento pa asina por trata e ley aki pronto.