Oranjestad- E industria di turismo di Aruba a sigui demonstra su liderazgo durante e conferencia di dia Internacional di Turismo 2019, contando cu participacion di mas di 300 invitado cual tabata consisti di entre otro, mandatarionan, socionan clave di industria, studiantenan di Colegio EPI unidad ‘Hospitality & Tourism’ como tambe studiantenan di e Facultad di ‘Hospitality & Tourism Management’ di Universidad di Aruba, e ekipo di A.T.A. y prensa local.
CONFERENCIA
Diabierna mainta e conferencia a tuma luga na Renaissance Convention Center, unda cu Minister di Turismo Sr. Dangui Oduber a habri e conferencia, expresando su gratitud na tur esnan laborando den e industria di turismo, cu ta haci nan maximo esfuerso pa laga bishitantenan sinti nan mes na cas y asina sigui atrae bishitantenan pa disfruta di nos bunita destinacion. Alabes, Sr. Oduber a elabora riba e importancia di un desaroyo sostenibel pa Aruba. Sr. Oduber a splica cu Aruba ta un isla hopi diversifica cu orientacion internacional, pero uno cu ta trata di mantene y accentua mas su cultura propio, loke nos bishitantenan ta encanta. Ademas, a papia tocante proyectonan cu ta tumando lugar na San Nicolas, preparando Aruba pa e desaroyonan cu ta biniendo y oportunidadnan di trabao cu ta bay bin, cual ta relata na e tema internacional segun United Nations World Tourism Organization pa e Dia Mundial di Turismo 2019, ‘Turismo y Trabao: un miho futuro pa tur!’.
Durante e conferencia CEO di Oficina di Turismo señora Ronella Tjin Asjoe-Croes a toca diferente topiconan di con Aruba Tourism Authority ta trahando pa Aruba logra yega na un desaroyo duradero. A elabora riba e modelo di desaroyo turistico cu ta califica como uno di ‘high value, low impact’ y alabes a demonstra diferente strategianan y documentonan cu ta cla pa ehecuta pa Aruba cana e caminda di un desaroyo turistico duradero. Sra. Tjin Asjoe-Croes a sigui elabora riba resultadonan turistico, y tambe a lansa e inisiativa di ‘Aruba Promise’, aki ta pidi nos bishitantenan yuda nos cuida nos isla y proteha nos recursonan natural entre otro, respetando codigo di conducta cu nos ta spera di nan.
TURISMO 2019 VERSUS 2018
Aña 2018 tabata un aña excepcional den termino di entrada genera pa medio di turismo, e asina yama “Tourism Credits”, y a indica cu ta spera cu esaki lo cera 2019 cu un crecemento di entre 4-6%. E Mercado primario Norte America, a conoce un aumento di 7% na 2018 y a sigui ta fuerte den 2019. E region di Latino America excluiendo Venezuela tambe a conoce un aumento na 2018 y ta premira cu e lo cera cu un aumento den 2019. Tur Mercado Europeo cu excepcion di Inglatera, cu a wordo afecta door di fenomeno di BREXIT, a conoce un aumento na 2018. Ta premira cu e continente lo cera cu un incremento den 2019. Canada tambe a conoce un aumento di 8% na 2018 y ta proyecta di sera 2019 cu un crecemento. Aruba Tourism Authority ta proyecta di cera aña 2019 cu un crecemento di 3.6% ora tuma e total di tur mercado. Durante e prome ocho lunanan di aña 2019 REVpar (‘revenue per available room’) a conoce un aumento di 8.2%, basa riba entre otro riba un grado di ocupacion di Hotel di 86.6%, esaki ta e tarifa mas halto den region Caribe. Ta proyecta cu lo cera 2019 cu un aumento di e REVpar di entre 5-6%. Na aña 2018 turismo crucero a logra trece 815,161 bishitante na nos isla cual ta un record nobo. Aña 2019 turismo crucero ta proyecta di cera cu un cantidad similar cu aña 2018.
E conferencia a conta tambe cu presentacion di orador Paul Brady kende ta Editor Strategico di e compania SKIFT. Señor Paul Brady a toca varios tema manera entre otro e fenomeno di ‘over-tourism y under-tourism’ y e reto cu varios destinacion ta confrontando den e contexto aki, y a mustra varios ehempel durante e presentacion di kico ta haci pa cu esaki.
Rosabelle Illis, kende tabata maestra di ceremonia pa e magno evento aki tambe a logra capta atencion di tur esnan presente. E la trece su mensahe den forma di “storytelling” cu a wordo treci dilanti den forma unico y gracioso, cual a capta atencion di un y tur. E presentacion di Rosabelle, sigur a laga hopi hende hari, pero mas cu tur, e la a sa di inculca e compromiso cu nos tur mester tin cu nos isla pa asina yuda mehora nos calidad di bida como tambe e calidad di e estadia di nos bishitantenan.
PANEL
Alabes di duna un presentacion clave na esnan presente, señor Brady a fungi como moderador di un panel. E panel aki a conisti di studiante di Colegio EPI, Rachel Hennep, studiante di Universidad di Aruba, Laura Molina, gerente general di La Cabana Aruba Beach Resort señor Joe Najjar y Directora di De Palm Corporation señora Lisette Malmberg. E panel tabata un panel diverso unda por a comparti opinion y pensamentonan riba diferente nivel di nos cuidad.
TRAINING ‘SERVICE EXCELLENCE IN TOURISM’
Parti atardi di e dia aki A.T.A. a tuma e oportunidad di duna un session di entrenamento. E sesion a pone enfoke riba e importancia di excelencia di servicio den e industria di turismo. Orador pa e sesion aki tabata señora Claudine Pohl di ‘Aquila Center for Cruise Excellence’.
BISHITA NA SCOLNAN MAVO
Durante e siman di Turismo y e siman cu ta sigui A.T.A. a bishita y lo bishita diferente MAVO rond di nos isla pa asina logra conscientisa nos studiantenan riba e importancia di Turismo y tambe elabora riba kico A.T.A. su funcion ta y kico ta e trabao cu ehecutivonan di A.T.A. ta haci diariamente. Tambe ta amplia riba diferente tipo di trabou cu e industria ta ofrece, asina stimulando nos hobennan pa uni nan mes na e industria.
Oficina di Turismo ta bisa danki na tur cu a yuda haci di e siman tras di lomba uno exitoso. Alabes, un biaha mas, ta felicita esnan cu ta traha duro pa cu desaroyo di nos turismo. Turismo ta toca nos tur y e bienestar di e industria aki ta un responsabilidad colectivo. Pa cuida nos turismo.