Home » Pareha turista a adopta un mucha homber Arubiano di 9 aña, pa asina dune un mihor futuro

Pareha turista a adopta un mucha homber Arubiano di 9 aña, pa asina dune un mihor futuro

by Admin
0 comment 163 views

Historia di Aruba, 1964

Fuente: Coleccion di Dufi Kock

Un pareha mericano a keda asina encanta cu un e hobencito arubiano di fam Simmons, cu nan a dicidi di adopt’e y hib’e bay biba na Merca pa asina e por haya un mihor porvenir, esaki a sosode na Oktober di aña 1964.

Un businessman mericano di fam Riback, for di e prome biaha cu ela bishita Aruba na aña 1961, a keda asina encanta cu Aruba, cu frecuentemente e tabata bishita Aruba. Durante un di su biahenan ela conoce dos ruman hoben, kende a demostra nan amabilidad grandi na Sr Harry Riback. E dos hobennan aki a hiba Sr. Riback riba un tour, manera un guia professional, na tur e lugarnan cu nan a pasa cu Sr. Riback, nan tabata splik’e of cont’e algo di e lugarnan aki.

E dos hobennan aki tabata forma parti di un famia Simmons cu aparentemente lo tabata biba den area of na Santa Cruz. Harry Riback a haya hopi aprecio pa e criaturanan aki y mirando cuanto trabou e mama di e muchanan aki tabata pasa pa cria su yiunan, Harry a tuma un decision y a duna e mama un proposicion.

Ora Harry Riback a regresa Merca, di biaha ela papia cu su señora y su señora  mesora a bay di acuerdo pa nan cuminsa cu e proceso oficial di adoptacion, ya cu e mama di e hobencito tabata di acuerdo caba cu e adoptacion.

Mesora a cuminsa cu e corespondencianan pa asina por inicia cu e proceso oficial di adoptacion. E pareha a ricibi tur cooperacion di parti Censo y Gobierno di Aruba.

Riba Dialuna 25 di oktober 1964,  den presencia di Hues aki na Aruba, James Simmons di apenas 9 aña di edad a wordo oficialmente adopta pa Sr. y Sra. Riback. Sr Riback tabata sinti’e hopi orguyoso y a priminti di duna James tur e cuido y yudanza cu ta na su alcanse.

E tabata un sacrificio hopi grandi pa James su mama, ora ela ricibi e oportunidad aki. Harry Riback y su señora a priminti cu nan lo haci tur lo posibel pa brinda e hobencito James Simmons un oportunidad brillante.  E tempo ey y mucho menos awendia, oportunidadnan asina no tabata algo cu ta toca tur dia na porta di famianan den hopi necesidad.

Sr. Riback despues di a ricibi su yiu adoptivo a laga sa cu prome cos cu elo haci ta inscrbi James na un bon scol y pone sinti cu e ta realmente na cas, tambe cu un dia mama di James lo por ta orguyoso di e gran sacrificio cu ela haci pa duna su yiu stima un miho porvenir.

Na aeropuerto di Aruba riba diaranson 28 di Oktober 1964, James a despedi di su famia biologico na Aruba. James semper tabata scucha tur dia e avionnan pasa, pero e dia aki ela experiencia berdaderamente kiko ta bula den un avion. James despues di a despedi di su querido famia na Aruba a subi den avion cu su mayornan nobo, rumbo pa New Jersey, pa su hogar nobo.

Antes algo asina tabata di gradici e famia cu a adopta e mucha aki y tabata duna e mama cu ta keda tras un  admiracion enorme, mirando e probresa cu e famia lo tabata bibando aden, e mama ta scoge pa duna un di su yiunan un oportunidad di grandi di progresa.

Ken e James Simmons aki ta pa nos di Arubanative.com no ta conoci, nos a haya e informacion aki danki na Dufi Kock cu tin un coleccion di e antiguo corant Arubiano “Observador” warda.
Esaki a wordo publica dia 30 di oktober 1964.

Nos lo aprecia pa haya mas informacion di James Simmons, si e tin famia na Aruba ainda, con a sigui cu James Simmons y si e ta na bida, con ela progresa, ken e ta awendia. Un mucha door di ta asina amabel y bon mucha a haya un oportunidad di su bida.

SI James of un familiar di dje lo por comunica cu nos pa nos por combersa cune y haya sa mas.  Por email nos na [email protected]

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio