Polis a detene 6 hoben despues cu nan a bringa cu dos homber , nan a maltrata un y a hinka e otro, despues cu e hombernan a nenga di duna nan un sigaria.
Bloemendaal, Hulanda: E prome informe a drenta rond di 12’or y 35 di marduga, cu lo tin un pelea entre dos grupo di persona na e station Zuider Stationweg, segun e melder cu nan a hinka un persona tambe. Mesora polis a bay cu hopi urgencia na e sitio, na yegada nan a mira enberdad un grupo di 6 persona saliendo for di e station, cu tabata mustra cu ta trata di e sospechosonan di e pelea cu hinkamento.
Mesora polis a bay over na detene e grupo di 6 aki. Tabata ta trata di dos mucha homber di 17 aña, un di 18 aña, nan tres ta di Amsterdam, den e grupo tabata tin dos mucha homber di 14 y 16 aña di Haarlem. Tambe tabata tin un mucha muher di 18 aña envolvi cu ta di Amsterdam.
Na e station polis a topa cu dos homber, un di 21 aña y un di 20 aña, esun di 21 aña tabata ta herida na su cabes. Esun di 20 aña tabata tin un hinka na su pia. Ambos victima a wordo transporta cu ambulance pa hospital pa asina ricibi un tratamento medico mas avansa.
Aparentmente e sospechosonan a topa e victimanan na e station, un di e sospechosonan a pidi un di e victimanan pa dun’e un sigaria, e victima lo a nenga di duna nan un sigairia y asina a cuminsa mesora un pelea, cu maltrato y hinkamento.
Polis ta haciendo mas investigacion riba locual a sosode y tambe kiko e rol di cada un di e sospechosonan aki tabata ta den henter e pelea, cu e hinkamento y maltrato. E hobennan lo keda deteni mientrastanto e investigacion ta andando.