BARCADERA, Aruba: ASTEC a bolbe tuma nota di insinuacionnan contra nan existencia y e nivel di tarifanan den cierto medio di comunicacion. Ta bon pa bolbe clarifica cu ASTEC no tin ningun influencia riba e prijs di fuel y/of combustibel mirando cu importacion di fuel no ta pasa via waf na Barcadera. Pa bisa algo semehante no ta cuadra cu berdad!
E tarifa di ASTEC pa un container di 20 pia a cuminsa na Afls. 810,= na aña 1983 y durante e añanan despues a baha te na e nivel actualmente di Afls. 691,53. cu ta nifica un reduccion di casi 15%. Por a logra esaki debi na entre otro mehoracion di eficiencia den operacion di ASTEC riba waf cu a cuminsa desde inicio di su existencia y a continua na Barcadera.
Si compara e tarifa di ASTEC cu efecto di inflacion den e ultimo 35 añanan, ta nota cu e reduccion di e tarifa ta di casi 70%! Ora compara e tarifa di e compania stuwado na Corsou, cu ta Afls. 979,= pa un container di 20 pia, por nota cu ASTEC ta 30% mas abao.
Contrario na e percepcion robes cu kier purba crea den comunidad, e doñonan di ASTEC y empleadonan ta haciendo e trabao di stuwado hasta prome cu a funda ASTEC na aña 1983. Pues ASTEC ta existi pa por lo menos 35 aña caba!
ASTEC ta lamenta cu despues di tanto esfuerso di su empleadonan, stakeholdernan y partnernan di negoshi envolvi pa realisa e plan strategico di pais Aruba desde añanan nobenta pa muda nos waf di carga y pa crea un multi-cargo sea terminal ultra-moderno na Barcadera, cu cierto gruponan ta keda instiga pueblo cu mal informacion tocante e compania y nan tarifanan bon estableci.