Gobierno a cera e edificio blauw den Elleboogstraat , esaki despues cu e doñonan a duna permiso pa haci’e.
Oranjestad, Aruba: Diaranson den oranan di mainta, autoridad a cuminsa na cera e bentananan y portanan di e edificio blauw pabou ex hotel Central. Esaki a sosode despues cu Gobierno di Aruba a haya permiso di e abogado cu ta representa e doñonan di edificio .
Un di e motibonan tabata debi na e diferente kehonan cu e comerciantenan den centro di cuidad tabata tin di e adictonan cu tabata frecuenta of tabata biba den e edificio aki. Un otro motibo tabata e diferente incidentenan cu a sosode dilanti of den e edificio, maltrato, reglamento di cuenta, persona a bula for di e di dos piso y algun luna pasa e caso tristo di overdosis, den cual un dama a fayece.
Segun nos a compronde den e edificio aki tabata biba 4 adicto y e edificio aki tabata bou control di e conocido adicto ambulante “Chico Gang”. Despues di a ricibi e permiso, a inicia cu e trabounan di cera e edificio, cu ta welder e porta y bentananan pa evita cu e adictonan ambulante por bolbe drenta den e edificio.
Sr. Arthur Comenencia di FACT Team tabata presente na e sitio, na momento cu e trabounan tabata tumando lugar, pa atende cu e adictonan ambulante. El a splicanan, cu actualmente ta buscando diferente alternativa y tambe a bisanan cu por ehempel tin e Centro na Seroe Colorado unda cu por atende cu e adictonan, ta busca luga pa e hendenan aki, pa prepara nan pa despues manda nan pa rehabilitacion mas avansa den exterior.
Alo Franken di SAMBA, a splica cu hopi biaha ta duna nan un opcion, pero nan mes no kier. E problema di adiccion na Aruba ta hopi grandi. el a bisa tambe cu ta cera e luga aki, pero nan ta busca un otro luga pa hinca nan curpa, sconde y drumi. Hopi biaha mester keda papia cu e adictonan pa motiva nan pa bay na e luganan unda cu e FACT Team ta sugeri na nan. Un di e opcionnan ta SAMBA, unda cu e adictonan ta wordo atendi dunando nan alternativanan, pero charlanan tambe pa encurasha nan pa busca e caminda pa laga adiccion un banda.
E edificio blauw aki tabata antes un gym y pa basta tempo caba e ta bandona, e edificio aki a bay hopi atras. E doñonan mes, aparentemente no ta bibando na Aruba, nan tin basta tempo bibando den exterior. Desde awo e edificio blauw ta completamente cera, pero asina mes e instancianan concerni lo sigui controla pa evita cu e adictonan logra drenta bek y envadi e edificio aki.