Recientemente, Prome Minister Evelyn Wever-Croes a ricibi un delagacion di Centraal Bureau voor de Statistiek (CBS) na unda cu Prome Minister a ricibi tambe e grato noticia cu e siguiente Censo 2020 lo ta digital, danki na SETAR. Encuestadornan ta preparando caba pa durante dianan 3 pa 13 di october bishita casnan y a traves di un tablet lo haci e preguntanan.
Cada 10 aña tin un censo ta tuma luga. E ultimo censo tabata na aña 2010. Un censo ta hopi importante pa un pais pasobra e ta duna claridad riba exactamente cuanto hende ta biba na Aruba, con e calidad di bida ta, con e costo di bida ta, y asina hopi mas dato cu un gobierno mester pa por traha su maneho y pa por goberna. Actualmente CBS ta bay haci un pilot, pues un test, pa prepara pa e censo mes di 2020.
“Mi ta specialmente contento di mira cu e Censo 2020 lo ta digital. Asina nos ta innovando cada dia. Y asina e encuesta lo bay mas lihe y lo no tuma tanto tempo manera antes. Y e resultadonan ta disponible mas lihe y asina por yuda pa e maneho di nos pais”, Prome Minister Evelyn Wever-Croes a expresa.