No tin alivio pa pueblo pa cu e situacion malo cu a wordo crea pa Gabinete Wever Croes ta loke miembro di fracciondi AVP, sr Benny Sevinger a mustra a base di declaracion haci pa Prome Minister Evelyn Wever Croes den su discurso teni dialuna anochi.
No solamente esey pero ningun momento Prome Minister tabatin un solo mensahe di speransa of alivio pa pueblo. Gobierno no a bisa cu lo bai reduci e medidadnan cu nan a tuma, alcontrario prome minister ta pidi comprecion pa e siguiente pakete di medidfa cu tin cu bin.
Segun Sevinger, Evelyn Wever Croes a mustra bon cla cu pueblo ta den un bocht aworaki paloke ta maneho di su gobierno y na mes momento a mustra cu tin mas medida na caminda y cu su gobierno lo sigui hinca man den cartera di pueblo pa haya mas placa pa sigui previlegionan pa famia y sponsornan.
“Ningun momento Evelyn a bisa pueblo kico e tin pa pueblo pero solamente a sigui culpa gobierno anterior, hungando rol di victima mientras cu durante di campaña electoral e la sigura pueblo cu e tin solucion pa tur cos, cu e lo cambia tur cos sin cu e mester tuma medida.
Pueblo ya caba a haya sa e realidad di e Prome Minister, caminda e no a cumpli cu absolutamente nada di tur cos cu el a priminti di lo bay haci. Alcontrario a hasi lo opuesto.
Casi dos aña den gobernacion ainda Gabinete Wever Croes no tin un cos positivo pa duna pueblo, ni e gasolin barata cu el a priminti, ni reduccion di edad di pensioen cual tabata su propio conseho como director di departamento di impuesto, tampoco reduccion di prijs di awa y coriente, tampoco a subi salario minimo cu Afl 500,= mareca priminti. Gañamento so.
Na luga di duna pueblo un alivio pa nan por tin mas pa gasta den economia di e pais, Gabinete Wever Croes a aumenta tur producto creando inflacion di mas di 10% cu consecuencia cu pueblo ta cumprando menos.
Ora cu scucha un Prome Minister di nos pais bisa pueblo cu su persona ta sorprendi cu loke nan a haya di e gobierno anterior, ta un otro mentira flagrante di e prome minister di nos pais cu no tin capacidad ni sinceridad pa papia berdad. Tur cifranan nan tabata tin den nan posicion dor di jaar verslagnan, rekenkamer, Caft y departamentonan di gobierno.
Ta increibel pa scucha Prome Minister Evelyn cu cara di palo bisa pueblo cu su gobierno ta den un bocht na e momentonan aki, cual ta mesun cos cu e bisa pueblo pa wanta duro ya cu tin mas medida na caminda.
Aruba tin un Prome Minister cu tin como arte gañamento y e ta haci’e asina bon cu e mes ta kere cu nos ta kere. Evelyn mes a cuminsa kere e disparatenan cu e ta conta tur dia sin pensa cu pueblo ta esun cu ta sufri.
Cu otro palabra, pueblo ta den un bocht na e momentonan aki, sperando riba e sla cu ta bin dor di e medidanan nobo (sugar tax, Serlimar).
Sinembargo mientras cu pueblo ta den bocht sperando pa subi caminda recto, pueblo por ripara cu pa miembronan di famia y esunnan den gobierno, e futuro ta briyante ya cu tur cu ta famia, yega na famia, namora di famia, pensionadonan den famia, a haya nan parti di gabinete Wever Croes.
Rumannan ta tur caminda den edificio di Cocolishi, ganando miles di florin y kendenan no ta sinti e inflacion ocasiona pa gobierno di Evelyn, yiunan den servicio, primonan cu hasta haya problema cu husticia pa corupcion awordo gefix y ganando miles di florin den refineria Aruba.
Omo Rudy cu contract, como consehero di Minister di Husticia mientras cu den pasado e propio gobierno di MEP a bay di acuerdo pa kita parti di e cartera di Husticia for di dje pa motibo di bendemento di paspoort, pero awe ta strika placa cu ta wordo ranca for di saco di pueblo.
Si tin placa pa biahamento, pa bay tur parti di mundo, wak tur skina di mundo pero den hopi cas placa no ta yega pa famianan por paga coriente, awa y pone pan riba mesa.
Muchanan cu a bay scol e aña aki cu inform bieu ya cu placa no a yega pa nobo y asina por sigui menciona cantidad di situacionnan cu ta hopi serio na man di gabinete Wever Croes.
No por ta otro tampoco ora cu Prome Minister Evelyn y su gobierno a ranca 270 miyon caba for di cartera di pueblo, for di economia di e pais y por lo pronto pueblo y comercio lo keda den e bocht di gabinete Wever Croes mientras cu Premier hunto cu famia y amigonan, sponsornan y sostenedonan di partido, ya ta bayendo hopi leu, casi for di bista di pueblo, ya cu pa nan si tin placa,” Parlamentario Benny Sevinger a declara.