Home » Campeonato dedica na 3 destacante den futbol Osling Toppenberg tin un trayecto largo den futbol

Campeonato dedica na 3 destacante den futbol Osling Toppenberg tin un trayecto largo den futbol

by Admin
0 comment 68 views

 

 

ORANJESTAD, Aruba –  E aña aki Arubaanse Voetbal Bond (AVB) ta dedica e campeonato na 3 persona hopi conoci den futbol. Un di e personanan ta Osling S. Toppenberg, kende a cuminsa su carera na nivel nacional den e deporte di futbol cu su 14 aña pero tambe tabata hunga baseball y basketball. E tin un trayecto largo den futbol como hungado, coach, dirigente/bestuurslid LI-PROF y referee.

 

El a cuminsa cu S.V. Estudiantes hunto cu su ruman Etty Toppenberg. E tabata un hungado di futbol cu semper a destaca como keeper. E tempo ey Etty Toppenberg tabata capitan di team y inesperadamente a manda Osling Toppenberg como keeper despues cu e keeper no tabata comporta su mes. El a sigui practica futbol di tal nivel y a haya oportunidad pa destaca representando Aruba y Antias den varios ocasion na nivel nacional y internacional. Osling Toppenberg ta agradecido na Etty Toppenberg p’e oportunidad cu el a ricibi, tambe e ta gradici su ruman Yubi di a motiv’e pa ta responsabel ora di practica deporte.

 

Osling Toppenberg a destaca cu Aruba Juniors na nivel Junioren y Hoofdklas, pero tambe a destaca cu R.C.A y Dakota. El a titula campeon na diferente ocasion cu e clubnan respectivo. El a hasta defende e bandera di R.C.A. contra S.V. Estrella, cual wega el a hunga cu un man kibra pa 40 minuut. Na varios ocasion coachnan di Aruba, manera Edmundo Kemp di Aruba y Pedro Dacunha di Corsou, a selecta Osling como keeper principal di seleccion. Na 1964 Osling su carera deportivo casi a termina durante un wega entre Guatemala y Honduras, door di un lesion pero a recupera y tabata representando Antias den e prome weganan di Reinado na Surinam como e keeper principal.

 

Coach di futbol

Osling a sigui den futbol como coach, pero a cuminsa na un edad jong como assistent trainer di RCS hunto cu Gachi van Kleef, despues a bira assistent trainer na R.C.A. di e legendario Chas Loefstok. El a bay biba na Puerto Rico pa su trabou y a cuminsa practica futbol como di varios team na nivel, unda el a titula campeon cu 4 diferente team. Tur su preparacion a hib’e pa Spaña y Mexico atendiendo seminarionan, pero tambe el a haya oportunidad di dirigi e seleccion nacional di Puerto Rico pa 5 aña participando den 2 campeonato di CONCACAF na Santo Domingo y Canada.

 

El a ricibi un reconocimento como e coach mas destaca durante e weganan ey. Como coach di un pais stranhero tabata un experencia historico inolvidabel pa un Arubiano. Na 2 ocasion el a prepara e seleccion nacional pa hunga contra New York Cosmos unda e legendario Rey di futbol Pele tabata hunga. El a duna clinica na Puerto Rico y Santo Domingo cu Angel Botta, kende e tempo ey tabata dirigi e seleccion di Santo Domingo. El a regresa Aruba na 1980 como director di American Airlines y den su oranan liber a sigui dedica tempo den futbol. Na varios ocasion Osling tabata coach di seleccion di Aruba den categoria hubenil y senior. El a asisti Bubali como coach y na 1 ocasion La Fama.

 

Dirigente/bestuurslid LI-PROF

Pa varios aña hunto cu otro miembronan tabata dirigente/bestuurslid di e organisacion LI-PROF. Nan a dirigi e organisacion cu exito. No tabata facil pero a sa di lanta e nivel di futbol mas halto posibel bou un bon relacion cu AVB.

 

 

Referee

Etty Toppenberg ta un di e personanan cu a motiv’e pa ta den futbol, pero su amigo di cas Hubert Porois-Tromp a motiva Osling pa fluit wega. E tempo ey Porois tabata e referee mas destaca na nivel nacional como internacional. Osling a bay Hulanda cu su famia y a dirigi 250 wega na nivel di amateur  den e organisacion KNVB.

 

El a bin bek Aruba na 2012 y a dirigi weganan local. Diferente biaha e tabata orador di refereenan hunto cu otro coleganan bou supervision di AVB. Semper e ta prepara pa asisti clubnan unda cu e por y ora su trabou ta permiti. Na final di 2018 Osling a stop di dirigi weganan pero semper ta pendiente riba e desaroyo di nos futbol cu ta den un bon man di e actual presidente, esta Richard Dijkhoff.

 

E ta gradici Richard Dijkhoff pa su consideracion di dedica e campeonato 2019/2020 na su persona, pasobra esaki ta algo di elogia profundamente. “Na e publico di futbol danki pa boso atencion y aplauso durante mi carera den e deporte rey futbol. Igualmente un agradecimento na tur hende cu a brinda mi e oportunidad di traha, dirigi y hunga futbol cu nan. Sin boso participacion sigur e mundo di futbol lo tabata diferente,” ta Osling Toppenberg su palabranan.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio