Durante e siman di 23 pa 27 di september, Prome Minister di Aruba Evelyn Wever-Croes, lo ta na New York pa asisti varios reunion y evento di nivel halto na e di 74 Reunion General di Nacionnan Uni (‘General Assembly’). E Reunion General di Nacionnan Uni ta un reunion anual cu ta trece 193 estado miembro pa discuti y traha riba varios reto internacional entre otro desaroyo, cambio di clima, paz y siguridad y mucho mas. E reunionnan aki ta tuma luga tur aña cu tur e miembronan na e sede di Nacionnan Uni na New York.
Aruba lo forma parti di e delegacion di Reino Hulandes. E delegacion aki ta consisti di Premier di Hulanda, Rutte, Prome Minister Wever-Croes di Aruba, Prome Minister Rhuggenaath di Corsou y Prome Minister Marlin-Romeo di Sint Maarten. Minister Blok di Relacionnan Internacional, Minister Kaag di Comercio Internacional y Cooperacion pa Desaroyo, Minister Niewenhuizen di Infrastructura y Maneho di Awa, Minister Bruins di Salubridad y Sport, y di Aruba Minister Lampe di Educacion, Ciencia, y Desaroyo Sostenibel tambe lo tey presente. Ademas e pareha real Rey Willem-Alexander y Reina Maxima tambe lo forma parti oficial di e delegacion di Reino Hulandes.
Prome Minister Wever-Croes lo organisa un reunion di tarima di mas halto “high-level” durante e siman aki riba e topico di implementacion di SDG 16+ door di islanan. Rey Willem-Alexander tambe lo ta presente na e evento di Aruba hunto cu lidernan di region y paisnan mas grandi. E meta di e evento aki ta pa crea cooperacion cu otro islanan den desaroyo y organisacionnan di Nacionnan Uni pa yuda combati corupcion y pa fortalece institutonan transparente. E mesun topiconan aki lo wordo discuti durante Minister President su discurso na e Revision di e SAMOA Pathway riba e retonan y progreso riba e area di integridad. Ademas, Prome Minister Wever-Croes lo atende varios evento importante y lo hiba discursonan riba topiconan di derecho di hende muhe, innovacion, cambio di clima, corupcion y tambe e implementacion di e metanan pa desaroyo sostenibel (SDGs).
Ademas di e eventonan formando parti di e Reunion General di Nacionnan Uni, Prome Minister Wever-Croes lo tin varios reunion cu organisacionnan y institutonan importante como por ehempel, World Tourism and Travel Council (WTTC), Clinton Foundation, Organization for Economic Cooperation and Development (OECD), y World Economic Forum (WEF) y lo hiba diferente discurso y comparti Aruba su vision y plannan pa crea un economia resiliente, institutionan fuerte y transparente catalisa door di innovacion.
E WTTC lo tene un forum cu e topico di Clima y Accionnan pa Medio Ambiente. Prome Minister Wever-Croes, lo tene su discurso durante e evento aki riba e topico di clima y desaroyo sostenibel di turismo. Ademas di esaki, Prome Minister Wever-Croes den nomber di Gobierno di Aruba, lo firma un Letter of Intent (LOI) cu WTTC pa fortalece e relacionnan cu partners pa por explora oportunidad pa sigui desaroya innovacion den turismo y viahe.
Pa locual ta trata Clinton Foundation, Prome Minister Wever-Croes a ricibi un invitacion pa un “roundtable” priva, hunto cu Ex-Presidente Bill Clinton y 25 diferente lider y ehecutivonan di companianan cu ta forma parti di Fortune 500. E topico lo ta e region Caribense, desaroyo economico sostenibel, innovacion y con nos por prepara pa retonan di futuro teniendo den consideracion e cambio di clima y nos medio ambiente. Clinton Foundation ta conoci pa ta hopi activo den Caribe, y specialmente pa asistencia brinda despues di desasternan natural.
Riba invitacion di OECD, Prome Minister Wever-Croes lo participa na e lansamento di un “Global Hub on the Governance for the SDGs”. A base di colaboracion, e “Global Hub” aki lo stimula e capacidad di gobiernonan rond di mundo pa enfrenta e retonan cu ta bin cu e implementacion di e metanan global (SDGs), defini pa Nacionnan Uni. Prome Minister Wever-Croes lo elabora riba e prioridadnan pa Aruba, y e esfuersonan haci pa por logra y trece conscientisacion riba e metanan, Aruba su plan di maneho pa cu eGovernment y integridad. Esaki lo wordo haci den presencia di diferente mandatarionan y lidernan global, como tambe media internacional.
Pa cu e evento di World Economic Forum (WEF), topiconan cu lo wordo discuti entre otro ta: Integridad, Transparencia, Iniciativanan pa combati corupcion, y e rol di Tecnologia den tur esaki. Manera ta conoci, e topiconan aki ta di sumo importancia pa Aruba, den cuadro di e prioridad poni door di Gabinete Wever-Croes riba Integridad y “Good Governance”.
Na comienso di e siman Prome Minister Wever-Croes lo reuni cu un grupo di lider muhe prominente y ehecutivo na New York di institutonan importante y companianan di sector priva pa establece lasonan nobo pa Aruba y atrae inversionista pa proyectonan importante.
E meta di e biahe aki ta pa crea partnerships pa por yuda resolve retonan social economico y pa logra un desaroyo mas sostenibel di nos isla. E ambicion di Aruba pa fortalece relacionnan cu organisacionnan paden y pafo di Nacionnan Uni y sector priva lo yuda nos logra nos metanan mas lihe.