Zr. Ms. Groningen a rescata seis piscado Venezolano, cu tabata tin 18 dia perdi riba lama, e boto di e piscadonan tabata drief mas o menos 60 miya panort di Boneiro, na momento cu e barco di Marina Real Zr. Ms. Groningen a inicia cu un operacion di rescate, cual a resulta exitoso, tur 6 piscado a keda rescata y nan boto a wordo hiba Boneiro.
Kralendijk, Boneiro: Riba e anochi di 19 pa 20 di september e avion Dash-8 di Warda Costa a detecta un boto di piscado ‘Eudismar y a mira cu e tripulante tabata zwaai y pidi ayudo, esaki tabata na un distancia di 60 miya panort di Boneiro. E avion di Warda Costa mesora a comunica cu e Tankero Liberty Bay, cu tabata mas cerca di e boto pa asisti e piscadonan aki.
E Centro di Rescate y Coordinacion di Warda Costa a avisa Zr. Ms. Groningen, cual e ta e barco di Marina Real cu ta patruyando den e area di Caribe. E barco Zr. Ms. Groningen, mesora a sali bay direcion di unda e boto di piscadonan tabata drief, pa por dunanan prome auxilio.
E Tankero Liberty Bay a wordo pidi pa keda den e area di e boto di piscado te ora cu Zr. Ms. Groningen yega pa asisti e piscadonan.
Na yegada di Zr. Ms. Groningen, nan a bin compronde cu e piscadonan abordo di e boto ‘Eudismar’ tin 18 dia ta drief riba lama, despues cu nan a motor di boto a daña, na momento cu nan tabata piscando den cercania di Trinidad & Tobago. Na e momentonan ey e piscadonan ya caba tabata tin algun dia caba sin cuminda y awa, nan estado di salud a cuminsa bay hopi atras y tur cu hopi urgencia tabata tin mester atencion medico. Na momento cu nan a wordo rescata, e seis piscadonan ya a perde tur speransa caba cu nan lo wordo rescata y sobrevivi esaki.
E barco Zr. Ms. Groningen mesora a duna tur seis piscado atencion medico, tambe nan a haya awa y cuminda. E servicio tecnico riba e barco Zr. Ms. Groningen, a pone un motor riba e boto di e piscadonan y asina bou guia di e Zr. Ms. Groningen, e boto y e 6 piscadonan a wordo hiba Boneiro,
E piscadonan a wordo entrega den man di Warda Costa, Koninklijke Marechaussee y tuma e encargo pa e piscadonan haya tratamento medico na hospital na Boneiro.
Zr. Ms. Groningen desde 20 di april 2019, ta activo den e area di Caribe. E Barco ta bou comando di Kapitein-Luitenant ter Zeer, Nicole Kuipers, e barco ta wordo usa pa e trabounan di Kust wacht, operacionnan ta combati droga y unda ta necesario asistencia humanitario, E Accion di rescate aki ta e prome accion exitoso despues cu recientemente a cambia e tripulante 6 di september ultimo.