Home History of Aruba Cuatro hoben Arubiano a disparce riba Lama, Everaldo, Lezinio, Francisco y Jose,...

Cuatro hoben Arubiano a disparce riba Lama, Everaldo, Lezinio, Francisco y Jose, Skirbi pa Dufi Kock

SHARE

Dia 12 di juli a cumpli 66 aña, cu cuatro hoben Arubiano di apenas 16 aña di edad ta disparce den un boto di pisca di 20 pia cu e nomber “Union”. E hobennan aki, Srs. Francisco Erasmus, Lezinio Henriquez, Everaldo Croes y Jose Winterdaal, tur di Santa Cruz, dia 12 di juli 1953, a coy un boto na Palm Beach sin permiso, ta ser bisá, banda di mei anochi y sali bay pa lama cu un destino desconoci. Ora nan no a bolbe e siguiente dia, alarma a ser bati.

Un buskeda extenso riba lama a inicia Tres avion di Aruba Flying Club, pilotea pa empleadonan di Lago, Srs. John Sherman, Alex Shaw y Paul Gordijn a busca den vecindario di Monki y te dilanti di costa di Colombia. Tambe tur flota di Lago su tankeronan y otro barconan a ser spierta pa e departamento di Marina di Lago. Desafortunadamente, e buskedanan aki no a duna resultado. (E storia aki ta aparece den Aruba Esso News di 31 di juli 1953.) Si tin cualkier persona cu tin mas detayes, por fabor laga mi sa….dufikock@gmail.com.) Danki.

Dia 12 di januari 2015 – Alexandra Tromp (amiga riba Facebook) a bisa mi cu un di nan, Everaldo Croes ta omo di dje, ruman di su mama. Everaldo tabatin 17 aña di edad.


Everaldo Croes

Everaldo Croes a nace na Aruba dia 23 di januari 1937, yiu di Paulus Croes y Leoncita Luidens. Paulus a nace na Aruba dia 13 di augustus 1914 y a muri na Aruba dia 21 di December 1986. Leoncita a nace na Aruba dia 13 di januari 1915 y a muri na Aruba dia 19 di april 1989. Nan tabatin 12 yiu.

Aki ta sigui un entrevista haci pa Alexandra Tromp, sobrina di Everaldo a tene cu e ruman di Everaldo Croes, Sra. Fabia:

Everaldo tabata un persona cu tabata practica bodybuilding y core bicicleta y a gana hopi copa.  Bou un palo di kwihi, pabou di cas, e y varios mucha homber di San Nicolas, Savaneta y Noord tabata bin cu bicicleta pa bin train cu Everaldo.  Ora e bay competi, e tabata gana copa.

Everaldo tabata un persona cu hopi exigencia, e tabata bisti mocasin y paña di bon marca pasobra De Veer, unda e tabata traha tabata pag’e bon.  E tabata tuma su diet y no tabata come tur sorto di cuminda pasobra e tabata mantene su curpa den bon condicion.  E tabata bebe hopi lechi y ovaltine cayente.

E tabata biba cerca su mama.  E tabatin e custumber di bay misa riba Diadomingo.  Un dia e mama a lanta y no a encontra cune.  Everaldo a lanta marduga y bay cerca famianan

 Gonzalez cu tin tres ruman homber, esta Figerio, Orlando y Landivo.  E famia aki ta laba auto pa gana un cachicachi.  E mama tabatin un mal soño marduga unda el a perde  Everaldo y cu e yiu ey no ta di dje mas.  E mama a bay den su kamber y a haya straño cu 8’or ainda e yiu no a yega manera custumber, despues di misa di marduga.  Asina ora a keda core, 9’or, 10’or y e tempo ey no tabatin telefon cellular, ta polis tabatin.  E tata a bay cerca e famia Gonzalez pa puntra si nan por a mira e yiu.  Pa 12’or di merdia e tata a bay Warda di Polis.  Ora el a yega warda di polis, el a topa cu tres tata cu e mesun storia.  Nan tambe a lanta mainta y no a encontra nan yiunan.  E polisnan a haya hopi straño.  Despues a yega un famia Heyden pa reporta cu nan a perde un boto di 20 pia.  Sospechoso ta cu nan a pensa cu ta e hobennan aki a bay cu e boto, pero te dia di awe no tin prueba cu ta nan a bay cu e boto.  Si nan ta na bida of morto, no tin prueba.  Hopi hende a bin cerca e famia di e cuatro hobennan aki pa cobra pa bin trece nan bibo.  E tata di Evealdo a bisa nan cu si ta Fls.500.00 nan ta cobra, lo e duna Fls.1,000.00, basta nan trece su yiu homber.  Nan a bay y no a bolbe mas.  E otro tatanan si tabata despuesto pa paga.  Pero tata di Everaldo si a keda insisti cu sin nan trece su yiu homber, e lo paga dobel.

Mama di Everaldo a keda un aña den trauma, un aña sin bay stad.  E primanan tabata cuida e otro yiunan cu tabata chikito.  Un di e mamanan tabatin un werkboek di Inko.  Den e werkboek bo tin potret chikito di e famia y tur e mamanan a haya un papel pa bay busca e werkboek.  Un di e mamanan a bay busca e werkboek den taxi y e a keda yora y yora y el a muri di un atake.

Nan tabata cuatro hoben, Henriquez, Erasmus, Winterdal y Croes.  Tabata ser bisa, pero no por confirma, cu tabatin un mucha homber cu mester a uni cu nan pero a yega laat.  Bo no por confirma esey tampoco pasobra ta hopi storia a ser inventa y no tin prueba of confirmacion.

E cos aki a sosode na aña 1953.  Na aña 1991, ora e mama y tata di Everaldo a muri, y cu e ruman homber tambe a muri, e otro rumannan a bay pa cuenta di cas y tereno, nan a bin ripara cu den e trouwboek, Everaldo su nomber no a wordo kita for di den e buki.  Nan bay Censo y eynan nan a bisa nan cu Everlado ta bibo ainda, pasobra nunca el a wordo declara perdi of morto…….e ta bibo.  E ora mester a paga un abogado Fls.3,000.00 pa pone un anuncio (oproeping) tres biaha den corant pa motibo cu ora bo perde un miembro di famia tin tres anuncio pa e bin bek sino nan ta declara cu e ta perdi of morto.  Despues cu e abogado a pone e oproeping tres biaha den corant y sin resultado, e nomber di Everaldo a wordo kita for den e trouwboek.

Asina Everaldo y tres otro hoben a bay sin bolbe bek y te awe no tin pista si nan ta bibo of morto.  .