Oranjestad, Aruba – Recientemente, den presencia di Minister di Enseñansa, Ciencia y Desaroyo Sostenibel, Sr. Rudy Lampe y directiva di Fundacion Parke Nacional Aruba (FPNA), a firma un Memorandum of Understanding (MoU) den Hofi Shon Shoco na Parke Nacional Arikok.
E MoU ta fortifica e lasonan entre FPNA y Gobierno di Aruba. E Ministerio di Enseñansa, Ciencia y Desaroyo Sostenibel ya pa e ultimo lunanan ta sondia e diferente opcion pa e alumnonan di Scol pa Ofishi unda nan por sigui siña y desaroya nan mes pa asina tin tur e conosemento y experienca na momento cu nan drenta e mercado laboral.
E acuerdo firma cu Gobierno di Aruba ta inclui e intencion pa FPNA yega na realisa un jardin botanico, pa asina por contribui na e bienestar di tur cuidadano. Mientras cu e alumnonan ta traha na FPNA nan lo yuda desaroya e jardin botanico, un proyecto cu lo wordo realisa durante varios aña y lo sosode den varios etapa. E jardin botanico lo enfoka riba flora local y lo fungi como un jardin unda lo por hasi diferente sondeo scientifico, lesnan educacional, y realisa esfuersonan pa conservacion di naturalesa. E jardin botanico ta wordo desaroya specialmente pa e comunidad di Aruba, pero por ta sigur cu nos turistanan tambe lo bishita y experienca e jardin.
FPNA ta sumamente contento di por forma parti di e proyecto aki mirando cu e ta incorpora e tres pilarnan mas importante di FPNA cual ta conservacion, educacion y recreacion. Sostenibilidad lo ta un tema sigur di hopi importancia ya cu lo ta explorando diferente manera pa incorpora trabounan di jardin na un manera balansa cu Aruba su medio ambiente.