Awe pueblo por a constata cu bao di Gabinete Evelyn Wever Croes tin democracia. Pa hopi tempo pueblo tabata boga pa e separacion di podernan unda parlamento no ta un stempelparlement manera tabata e fraccion di AVP y a conduci cu awe pueblo ta bibando e desaster financiero pero tambe proyectonan cu pueblo tin di bay paga manera nos Hospital cu a resulta un fracaso total costando mas cu dobel di locual a presupuesta. Dealnan coruptivo manera Citgo cu awe nos ta hayando e facturanan di esaki. Pero awe pueblo por wak den e discusion di e ley di Laft cu democracia ta bibo na Aruba.
Separacion di poder
Den e filosofia di e Trias politica Gobierno tin su autoridad y tambe parlamento. Den esaki gobierno a entrega un ley y cu parlamento den su autoridad a haci e cambionan cu nan ta haya cu ta constitucionalmente corecto y a aproba esaki. Na momento cu esaki a pasa, a surgi un discusion unda e autoridad di CAFT a keda y cu ta di primordial importancia pa Aruba su credibilidad financiero riba mercado internacional. Gobierno den su autoridad a haci uso di su derecho pa no ratifica un ley cu ta bin di nan, y a manda constitucionalmente corecto su obheccionnan pa no haci esaki.
Confiansa di Hulanda den nos Promer Minister y parlamento
Cu e decision di awe mainta di parti Conseho di Ministro di Reino ta mustra e confiansa den nos Promer Minister pa su bon trabao cu el a bin ta haciendo riba finansas publico hunto cu Minister Xiomara Ruiz-Maduro pa stabilisa esaki. Y alabes tambe tumando e decision aki ta muestra cu ta respeta e trabao cu parlamento di coalicion a bin ta haci di controla nan gobierno unda cu tur mitar di aña gobierno tin di raporta na parlamento pero tambe con parlamento a para contra su gobierno pa locual pa nan den e ley di LAFT ta constitucionalmente incorecto. Awor cu e decision aki y sigur cu confiansa di Hulanda nos gobierno por sigui traha riba nos propio Camber di Presupuesto (Begrotingskamer) cu tambe ta un logro grandi cu mester a bin na 2021, awor lo bin na 2020 mustrando un biaha mas cu gobierno ta riba e caminda corecto pa pone nos finansas di pais Aruba na ordo.
Mike Eman mester tin berguensa
Mike Eman mester tuma honor na su mes. Cada bes ta bin y trata na manipula pueblo pero sigur dividi un pueblo cu awor mas cu nunca mester uni pa sali dilanti. Un lider zwak compara cu Prome Minister Evelyn Wever-Croes kende fuertemente ta asumi su responsabilidad y ta para pa pais Aruba. Un Mike Eman cu awor kier tilda di tin crisis constitucional y di mocion di desconfiansa cu bao su gabinete y su parlamento e palabranan aki no tabata existi y principalmente den caso di Minister Paul Croes cu tabata cera y cu Mike Eman a exigi su stempelparlament pa no bin cu niun mocion di desconfiansa, pero pio ainda pa cambia ley pa acomoda e minister aki enbes di mand’e cas. Pues Mike Eman, tuma honor na bo mes y bay biba trankil den bo penthouse. Bo ta e unico hende den e pais aki cu por biba den e mansion aki sin un salario mientras pueblo tin di paga su debe cu el a crea cu orguyo.