Den e ley di Landverordening Ruimtelijk Ontwikkeling (LRO) ta para cu mester tin un ROP y ROPV. E prome paso di ROP ya a pasa cual a keda introduci recientemente, pa cual aworaki ta bayendo pa e siguiente paso cual ta e ROPV. ROPV ta un etapa nobo pa Pais Aruba, considerando cu lo ta e prome biaha cu Aruba ta bay introduce esaki, cual ta forma parti di e desaroyo duradero di nos Pais, Director di DIP sr. Haime Croes ta splica.
Tin diferente area (gebied) defini riba e mapa di ROP di Aruba, tur cu un color cu ta indica na ki tipo di area e ta, sea ta pa vivienda, naturalesa, desaroyo economic etc. Awor cu e ROPV, pa cada area ta duna na esakinan un bestemming, pues definicion di kico por wordo haci den cada area. Esakinan ta wordo ‘uigewerkt’ den un ROPV nota y su toelichting.
Ya ta asina leu cu DIP tin esaki cla, mirando cu ley ta bisa cu pa por yega na un ROPV mester encamina un proceso mescos cu tabata e caso cu ROP. Mester presenta e ROPV nota, toelichting y e mapa nobo, den cual ta indica tambe cua ta e voorschriften cu mester tene cuenta cu nan den cada area, locual por y locual no por. Den cuadro di esaki tambe mester organisa sessionnan di encuentro “townhall meetings”. Mester percura pa splica pueblo kico e ROPV ta encera y duna oportunidad pa pueblo duna nan opinion y haci pregunta, pa por incorpora esaki den e nota.
Esaki lo ta e fechanan di e encuentronan cu pueblo:
E sessionnan lo tuma luga:
Dialuna 23 di September – Biblioteca Nacional Oranjestad
Orario: 6pm – 8pm
Diamars 24 di September – MFA Noord
Orario: 6pm – 8pm
Diaranson 25 di September – YMCA San Nicolas
Orario: 6pm – 8pm
Henter comunidad ta keda invita pa asisti y contribui na locual lo bira Aruba su prome ROPV, cu ta encera specificacion di locual por y locual no por den cada area (gebied) rond Aruba.