ORANJESTAD – Prome cu el a retira recientemente como Parlamentario, Sue-Ann Ras a entrega su ultimo proyecto di ley, cu e meta pa adapta ley di trafico conoci como ‘roekeloos rijden’ na presidente di Parlamento, sr. Ady Thijsen. Danki na e ley aki, dentro di poco, castigo pa violacion di ley di trafico lo bira mas severo cu posibel castigo di prison. Mester pensa riba entre otro riba esunnan cu ta bandona un sitio di accidente, sin cu a tuma nan declaracion, identidad y seguro, cu awor ta bira castigabel pa ley. Y tambe ta adapta e parti di ley di trafico pa esunnan cu core di un forma descabeya (roekeloos), cu chens cu nan ta causa un accidente cu daño serio y posibel resultado fatal.
CASTIGO MAS PISA
Si antes, varios di e casonan aki tabata haya sea un multa leve of ta caba den un caso civil, esaki awor por termina te hasta cu un castigo penal cu castigo di prison. Esaki no ta nifica cu automaticamente cada accidente, ta cay bou di e articulonan aki, pero lo investiga prome si e ta cumpli cu e ‘criteria’. Unabes conclui, huez por aplica e castigonan mucho mas severo cu antes, pa e dos casonan menciona.
CAMBIO
Segun motivacion di e awor ex parlamentario, a prueba cu hopi di e accidentenan actual ta trata ‘roekeloos rijden’, y tin hopi caso di accidente, unda cu e persona responsabel ta bandona e sitio di e accidente, sin consecuencia hopi biaha. A prueba cu e castigonan apropia ta mengua e cantidad di e accidentenan aki, cu hopi biaha ta sosode entre e hobennan di 18 y un poco mas halto. Pa por a logra haci e ley mas efectivo, a añadi un cantidad di criteria, cu ta cay bou di ‘roekeloos rijden’, manera; pasamento di auto di un forma peligroso, no duna preferencia, no core core banda drechi di caminda suficiente, surpasa velocidad maximo y core mucho pega tras di un otro auto.