ORANJESTAD- Diasabra ultimo na Plaza pa Jos na Colegio Arubano a tuma lugar Kiwanis Club of Aruba su di 23 entrega di “Clint Whitfield Outstanding Student Award” na e studiantenan di Colegio Arubano, cu a sobresali den e Aña Academico 2018 – 2019.
E reconocimento ta nombra na memoria di e fundador di Kiwanis Club of Aruba na aña 1964. Clinton Whitfield, un Kiwanian den felis memoria cu a traha cu amor y dedicacion durante hopi aña pa sirbi e comunidad di Aruba. E reconocimento na e studiantenan no ta solamente pa nan resultadonan excelente na nivel academico, pero tambe pa nan personalidad desplega, tanto cu e otro studiantenan como na e docentenan y na e comunidad.
E anochi a inicia cu palabranan di bonbini di door di Ebby Schwengle, cu a fungi como maestro di ceremonia y yama riba escenario Edalitza Weller, presidente di Kiwanis Club of Aruba pa habri e programa, sigui pa palabra di elogio pa felicita e studiantenan. Minister di Enseñanza Sr Rudy Lampe a hiba un discurso sigui pa “Governor Designate” di Easter Canada and The Caribbean District di Kiwanis International Robert Spellen, rector di Colegio Arubano Sra. Michelle van Loon y Inspector di Enseñanza drs. Arlenne Wever – Croes a hiba palabra na e studiantenan y nan famianan. Tambe presente durante e anochi aki tabata e mayornan, docente y mentornan di Colegio Arubano, representantenan di e Fundacion Clinton Whitfield y e miembronan di Kiwanis Club of Aruba.
E momento culminante di e anochi tabata ora cu e maestro di ceremonia Ebby Schwengle, a yama e 9 studiantenan pa bin dilanti. E siguiente studiantenan a ricibi nan “Clint Whitfield Outstanding Student Award” pa e aña escolar 2018 – 2019: Clinton Roga y Selena Solagnier (Ciclo Basico 1), Yaindy Maduro (Ciclo Basico 2), Nathan Solagnier y Nathan Lioe A Tjam (HAVO 3), Charissa Laing (VWO3), Natalie Nathu (HAVO4), Nicolle Vigil Muñoz (VWO 4) y Indy van Vliet (VWO 5). Na final di e anochi e studiantenan a ricibi un “goodie bag” yena cu regalo manera; certificado di Adidas, Bruna, Cinnabon, Marriott Aruba Resort & Stellaris Casino y productonan di Purell y Wendy’s.
Kiwanis Club of Aruba ta felicita tur e studiantenan cu a ricibi nan “Awards” y desea nan un Aña Escolar 2019 -2020 fructifero. Kiwanis Club of Aruba ta spera cu e premio aki por ta un estimulo pa tur studiante y maestro na Aruba. E studiantenan mester kere den nan potencial y sigui traha duro tur dia pa duna e miho di nan mes pa asina logra nan metanan y e maestronan ta un pieza clave pa tur dia motiva y guia e studiantenan. Finalmente, Kiwanis Club of Aruba ta desea pa gradici; Chef Kelly, Cinnabon, Dyon Center, Elite, Fundacion Clinton Whitfield, Ling & Sons IGA, Manrique Capriles, Marriott Aruba Resort & Stellaris Casino, Wendys y tur esnan envolvi den e proyecto aki pa nan excelente cooperacion y dedicacion.