Un curpa so haya, 30 persona y e boto te ainda ta desapareci, esaki ta dolor pa varios famia na Vela de Coro, nan no sa paradero di nan ser kerinan cu dia 7 di juni ultimo a sali den un lancha cu e intencion di drenta Corsou ilegalmente pero nunca lo a yega y nunca mas a tende di nan.
La Vela de Coro, Falcon, Venezuela: Diaranson ultimo, a yega bek na La Vela de Coro, e restonan mortal di Elio Ramones, un di e 31 personanan cu riba 7 di Juni a sali for di Punta Aguide, Falcon, den un boto cu destino Corsou, e intencion tras di e viahe aki tabata pa tur 31 persona di nacionalidad Venezolano drenta Corsou ilegalmente y algo te na e momentonan aki desconoci a pasa nan, te na e momentonan aki ta un curpa sin bida so a wordo haya.
Dialuna ultimo a sali un boto for di La Vela de Coro cu destino Corsou pa bay busca e curpa di Elio Ramones pa asina su sernan keri por despedi di dje y dere na su tera natal.
E curpa di Elio Ramones ta e unico curpa cu a logra haya di embarcacion sin nomber cu a sali for di Punta Aguide dia 7 di juni ultimo. E curpa di Elio a wordo localisa den awanan teritorial di Corsou dos dia despues cu e boto a desaparece. E causa di morto di Elio Ramones tabata hogamento.
Cruz Cora a haci tur lo posibel y a logra cu e curpa por a wordo hiba bek Venezuela, maske cu e fronteranan entre Corsou y Venezuela ta keda cera.
Familiaresnan di e otro 30 personanan desapareci, no ta perde speransa di haya nan famianan perdi bek, nan ta kere cu e otro 30 personan lo a wordo secuestra.
Famia di e 30 personanan desapareci a organisa den grupo y ta trahando pa hiba e caso aki internacionalmente y pa mira si asina nan por haya mas claridad den e caso tristo aki. Mayoria di e 30 personanan perdi ta habitante di La Vela de Coro y entrenan tin tres menor di edad.