ORANJESTAD – Mnister Ruiz-Maduro ta informa cu segun ultimo desaroyo internacional di prijs di crudo, tin un bahada di prijs den benta di crudo y otro productonan deriva di petroleo.
Esey sigur ta un bon noticia pa pueblo di Aruba, ya cu e prijs di gasolin ta baha e luna aki cu 10.6 cen.
Gobierno a absorba un total di 37.5 cen den subida di prijs di gasolin pa tres luna den lunanan di april, mei y juni e aña aki. Esey ta nifica cu Gobierno a alivia pueblo di Aruba pa paga 37.5 cen pa liter pa gasolin durante tres luna. Na luna di juli e prijs di gasolin a baha cu 1.5 cen. E prijs internacional di crudo a conoce un subida na augustus cu 7.1 cen. E luna aki e prijs di gasolin a conoce un bahada di 10.6 cen.
E mandatario ta sigui informa cu prijs di crudo internacional ta hopi volatil. Esaki mas bien ta door di varios factor manera entre otro: e oferta y demanda pa e crudo, cambionan den e industria di energia y combustibel, gastonan y problemanan di produccion, desaster natural, crisis politico riba nivel mundial ta algun di e factornan cu tin como consekuensia cu e prijs di producto petrolero internacional ta fluctua hopi.
E bahada di prijs di crudo internacional e luna temporada aki ta trece bahada di prijs di productonan petrolero na Pais Aruba tambe. Minister Ruiz-Maduro a sigui splica cu Gobierno di Aruba no por influencia e subida of bahada of subida di prijs di combustibel. E prijs di e productonan petrolero mundialmente ta un parti fiho denter di e sistema cu e prijs ta wordo calcula aki na Aruba.