ORANJESTAD – Diaranson atardi Minister di Turismo Sr. Dangui Oduber tabata presente na e edificio di ex Aqua Condominiums caminda e mandatario a haya un presentacion di e proyecto di Radisson Blu. Despues e mandatario a firma un carta di compromiso den nomber di Gobierno conhunto cu Beachside Development Company y Radisson Hotels International.
E proyecto hotelero aki a cuminsa na aña 2007 y a encontra hopi dificultad na caminda y a keda para pa anjas. Danki na e confianza den noc economia y gobierno Wever Croes, Sr. Venancio Gonzalez a cumpra e propiedad aki. Despues di esaki na anja 2018 e inversionista a acerca Radisson Hotels International cu e idea pa desaroya y converti e proyecto aki den un Radisson Blu Hotel.
Radisson Blu Hotel ta un proyecto grandi cu un inversion di mas o menos 80 miyon dollar cual lo tin un impacto sumamente positivo pa Aruba su economia. E desaroyador a haci un compromiso cu Gobierno cu ora e proyecto finalisa nan lo emplea mastanto yuinan di tera den nan servicio. E hotel lo bay contene 208 camber hopi luhoso pa atrae e turistanan cu tin un “spending capacity” hopi halto. Radisson ta premira cu pa por duna un servicio di alta calidad, e hotel lo mester 190 empleado den servicio.
Minister Dangui Oduber a expresa cu e ta contento cu Aruba su industria turistico ta keda destaca y mantene su mes den e top 5 paisnan mas bishita den Caribe. Pesei ta importante pa keda inverti den e industria aki pa e cresemento continuo ta uno sostenibel. Aruba ta keda un perla den Caribe, nos Turismo ta keda nos unico pilar y driver economico y pesey nos tur mester percura pa nos mantene nos calidad y nivel di servicio. Envez cu nos purba cuestiona y critica nos Turismo nos mester yuda fortalece.
Aki a ser demostra cuanto confianza inversionistanan tin den gabinete Wever Croes y minister Dangui Oduber pa inverti den un tremendo proyecto y tambe convence Radisson Blu habri su promer propiedad na Aruba. E cadena aki ta fit den vision y maneho di minister Dangui Oduber cu ta boga pa turistanan di calidad y tambe proyectonan di calidad manera esaki. Pabien Aruba.