Considerando e gran cantidad di informacion incorecto cu tin pa loke ta tarifa di recogemento y maneho di desperdicio, Gobierno ta emiti e siguiente informacion pa clarifica esaki.
Den e ley di Serlimar cu ta na Parlamento, no tin ningun aumento di prijs pa ningun ciudadano. E prijs di 25 florin ta e mesun prijs cu a yega na acuerdo a base di diferente dialogo cu sindicatonan, pensionadonan, Parlamento y Gobierno.
E prijs ta keda 25 florin y no tin ningun aumento di 210 florin riba e prijs aki y tampoco lo tin rebaho di e suma y ta mantene e tarifa social pa esnan di menos recurso. Ademas e tarifa ta fiha den e ley, cual Gobierno ta ratifica.
Locual cu e ley bieu y e ley nobo cu ta na Parlamento aworaki ta papia di dje ta di e hecho cu Serlimar ta cobra dos componente cu ta suma e 25 florin. Un di e componentenan aki ta pa recoge e sushi y e otro componente ta pa e maneho di e sushi. E ta 17.50 florin pa e maneho di sushi y 7,50 florin pa e recogemento di sushi, pues 17,50 + 7,50 = 25.
Un otro ponencia eroneo ta cu lo tin cobransa a traves di WEB, cual no ta e caso.
No tin ningun gasto adicional di WEB ni na ningun otro compania, pasobra e cobransa ta bay via Serlimar mes. Lo haci uzo di e database di WEB, solamente pa haya sa cua casnan ta registra/den uzo pa di e forma aki Serlimar por traha e cobransa.
Pues tur informacion cu ta circulando di aumento di prijs of cobransa adicional ta informacion robes/ incorecto! E acuerdo cu a yega na dje di 25 florin a sosode mas cu un aña pasa, ta uno cu ta respeta y ta e tarifa cu ta mantene. Finalmente mester agrega cu den e seis simannan cu tin tras di lomba, comunidad a responde hopi bon pa loke ta e cobransa di Serlimar y mas y mas persona ta cumpliendo cu nan pago di 25 florin pa luna na Serlimar pa por recoge y maneha desperdicio den forma responsabel.