Pa hopi aña companianan a recoge sushi y tira esaki na dump, creando e problema cu tin na dump. Ta normal ora cu ta bin cu cambio cu esaki ta bin cu resistencia, cual ta e caso aworaki door di diferente grupo. Pero hopi biaha e resistencia aki ta bin pa motibo cu hopi hende no ta lesa suficiente of no ta wak e informacion corecto prome cu duna comentario.
Un di e ponenencianan falso ta: cu e ley nobo di Serlimar cu ta na Parlamento lo crea monopolio, cual absolutamente no ta e caso. E ley ta specifica ki cuater tarea ta mara na Serlimar y riba cua tereno ta habri pa otro companianan continua cu ne. Pues tur compania cu ta reciclando plastic, carton y esnan cu ta reciclando y creando bio-diesel for di azeta bieu, tur compania existente den operacion ta keda wordo permiti pa eherce e tareanan aki.
Locual Serlimar ta regla den e ley ta encera e tareanan como compania nacional pa maneha e desperdicio despues cu recoge esaki. E ley na ningun momento ta papia cu ta kita derecho di companianan. Al contrario, e ley ta acalaria esun bieu permitiendo pa otro compania recoge sushi, cual no tabata permiti den e ley anterior. Ademas den e ley anterior cu a bin na vigor na (2005), tabata duna Serlimar e derecho unico pa recoge sushi di cas y pa loke ta comercial, tabata permiti e companianan cu tabata hacie e tempo ey pa sigui hacie. Sinembargo den transcurso di añanan Serlimar no por a brinda e servicio na comunidad cu tabata wordo desea, consecuentemente companianana cu tabata haci e parti comercial a amplea y a cuminsa haci residencial tambe. Pa e motibo ey a percura pa e cambionan necesario wordo haci cu awor si ta permiti pa un compania priva tambe por recoge sushi di cas.
E tarifa di recoge desperdicio ta 7,50 y e tarifa pa maneha desperdicio ta 17,50 cual ta suma na 25 florin total como cobransa di Serlimar. Importante pa comunidad realisa cu e tarea di Serlimar ta extende mucho mas cu e dos componentenan aki y ta enera recogemento di bestia morto for di riba caya, matanan cu mester wordo corta, mantencion di Aruba limpi en general entre otro.
Pa conclui, tur compania cu kier contribui na bienestar di Aruba mester por contribui cu e ‘fair share’ pa hunto por logra cera dump parkietenbos y crea un sanitary landfill y atende cu nos desperdicio den forma hopi mas responsabel di loke ta aworaki.