Home Politics PROME MINISTER A ASISTI NA CELEBRACION DI 70 ANIVERSARIO DI PAROKIA SANTA...

PROME MINISTER A ASISTI NA CELEBRACION DI 70 ANIVERSARIO DI PAROKIA SANTA FILOMENA

SHARE

Diadomingo ultimo 8 di september Parokia di Paradera a celebra e 70 Aniversario di Parokia Santa Filomena. Prome Minister Evelyn Wever-Croes den compania di su esposo, a asisti na e Santo Sacrificio di Misa Solem di Gradicimento pa despues sigui cu un brindis cu un bunita programa cultural.

For di tempran di atardi a cuminsa cu bunita procesion pasando den cayanan den Parokia acompaña pa Orkesta Harmonica Aruba, despues pa 6:00 pm a continua e bunita Santo Sacrificio di misa Solem di Gradicimento cu a wordo celebra door di Monseigneur Gregorio Redoblado, Vicario General di nos Diosis y hunto cu pastoor Toti Fuentebella y demas pastoor di diferente iglesia rond di Aruba. Despues di misa a sigui un gran celebracion den Centro Caiquetio unda parokianonan por a comparti un rato den bon ambiente hunto.

Prome Minister na e ocacion, den nomber di Gobierno di Aruba, a felicita Pastoor Toty Fuentebello, Mgr. Luis Antonio Secco, parokia di Paradera y nos pueblo cu e celebracion aki.

“Nos ta uni den oracionnan di gratitud na nos Creador pa tur bendicion cu El a auspicia riba Parokia Santa Filomena y su pastoornan cu a lidera e parokia e 70 añanan cu a pasa, y pa sigui bendiciona un y tur cu ta traha den parokia. Pabien Paradera! Pabien Aruba y biba Santa Filomena”.

Tambe Prome Minister a gradici e comision cu a traha duro pa logra un bunita celebracion pa Misa di Paradera