INTERPOL A PIDI DETENCION DI E PERSONA AKI
Shaba – Diahuebs den oranan di anochi autoridad na aiport a detene un persona buska internacionalmente pa Interpol, ta trata di un figura grandi den crimen organisa di labamento di placa.
E Chines aki tabata wordo busca rond mundo y autoridad atento na Aruba a logra pone man riba dje. E persona aki tabata tin dos maleta den su poder.
Pa mas o menos di 11’or y 25 di anochi, patruya di Noord a yega na Warda di Shaba cu e cabayero aki.
Tur cos ta mustra cu e chines cu tabata wordo buska internacionalmente tin famia of amistad na Aruba tambe, paso despues di un rato cu polis a trece na Warda di Shaba, un famia chines a trece cuminda pe, pero autoridad a nenga esaki rotundamente y a manda nan bek cu e cuminda.
Labamento di placa ta un crimen cu ta pisa hopi, pero hopi biaha dificil pa prueba, mas sigur internacionalmente lo mester tabata tin suficiente prueba pa detene e homber chines aki.
Mirando e maletanan tur cos tabata mustra claramente cu e homber aki lo a yega ariba un vuelo, den oranan di diahuebs anochi.
E detencion aki a bin di parti Interpol y afpak team. No ta conoci si den e maletanan aki autoridad lo por a haya un suma grandi di placa. E maletanan tabata hopi pisa cu e agentenan policial mester a haci basta esfuerso pa hibanan den Warda di Polis.
E caso ta hermeticamente cera y ta bou investigacion. Manera nos haya mas informacion di autoridad local referente e detencion di e chines aki nos lo informa pueblo. Labamento di placa sigur ta algo grandi y no ta descarta e posibilidad cu lo por cay mas detencion.