“Gobierno di Aruba, bou giua di sra. mr. Evelyn Wever-Croes, a firma un MOU cu Rivergroup pa bin cu un hotel na Baby Beach. Un inversion cu lo por surpasa 200 miyon dollar y cu sigur lo ta beneficioso pa e Pueblo di San Nicolas y vecindario. Gobierno di Aruba ta explorando diferente iniciativa cu di un ora pa otro lo bai concretisa den un estimulo positivo pa nos Isla su economia muy en especial e Sector Primario. E proyecto di expansion di Aeropuerto Reina Beatrix “Gateway 2030” ta un garantia di stabilidad pa loke ta nos pilar Economico di Turisimo. Esaki ta djis un par di ehempel riba cua caminda nos ta y con Gobierno di Aruba kier stimula economia. Despues di e rapport di Standard & Poor’s por conclui cu e confiansa ta bek pa Aruba. Segun e expertonan internacional di IMF, e situacion Financiero di Aruba ta recibiendo e atencion serio cu tanto nan tabata boga p’e te na e punto cu te hasta a pronostica un crecemento economico di alrededor di 3% pa aña 2020. Nos tin hopi trabao na hasi ainda y nos tuma e reto, pa con duro cu e porta, na serio na bienestar di Pueblo di Aruba” Minister Plenipotenciario, sr. Guillfred Besaril, a habri su reaccion cune.
E mandatario a sigui elabora: “Pues cu e no ta nada straño cu na salida di un reunion dificil manera esun di Diabierna 30 di augustus ultimo, mi ta sali declara cu awe nos ta trahando duro na restaura e confiansa. E palabra confiansa mi a uze den e contexto cu Hulanda ainda no a laga los di e debacle di 2014. Ta p’esey e ta increibel na mira poco politico – di awa dushi – ta core gara na un palabra pa asina nan tapa e berguensa cu nan mes a causa pa nos Pais na 2014! Na Madre Patria sigur e ta fresco den nan memoria con sr. Mike Eman, enbez di a scohe na subi un avion y atende cu Hulanda pa defende nos pida Baranca, a opta pa bai sinta bou di un tent na e otro banda di caminda di e oficina di Gobernador pa bebe Ensure! Esaki tabata simplemente un berguensa grandi”.
Awor Pueblo di Aruba ta conta cu un Gabinete Wever-Croes cu realmente ta atendiendo cu e reto cu e seriedad cu cada uno di nan ta requeri. CAFT, e ley di LAFT, cumpli cu palabracionnan entre Gobierno di Aruba y Gobiernio di Reino y atende cu Aruba su Economia, tur ta retonan den cual nos tin cu hasi un esfuerzo adicional. Tur esaki danki na un supuesto “Welga di Hamber” causa pa e Gobierno y Parlamento di AVP na 2014. Na final un momento den nos historia cu awe ainda ta hasi daño grandi na pais Aruba. Mas aun na momento cu bo keda confronta cu e pensamento general di Gobierno di Reino, esta cu un gobernacion no ta nada otro cu un continuacion”, sr. Besaril ta termina.