Home » Booshi Wever: AMBIVALENCIA TOTAL DEN ASUNTO DI SUPERVISION FINANCIERO DI ARUBA. NOS PARCE DI NO KIER DRECHA COS NOS MES NA CAS, PERO DI KEDA KNOEI!

Booshi Wever: AMBIVALENCIA TOTAL DEN ASUNTO DI SUPERVISION FINANCIERO DI ARUBA. NOS PARCE DI NO KIER DRECHA COS NOS MES NA CAS, PERO DI KEDA KNOEI!

by Admin
0 comment 58 views

 

 

Mientras cu na Aruba fanaticonan partidista ta di hubilo, pretendiendo cu e noticia di Hulanda y CAFT ta positivo pa Aruba, nos ta mira cu tanto di RMR y Parlamento Hulandes, e noticianan no ta dje alentador ey. Keto bay e discusion ta sigui tocante e supervision independiente cu Hulanda kier wak, esta los di politiek Oranjestad, nos ta corona obra aki na Aruba dor di keda sin entrega presupuesto na tempo, loke ta un incumplimento cu nos leynan segun e propagandanan di Bureau Integriteit Aruba!!

Diripiente parce segun Prome Minister cu aki no tin nada di falta di integridad. Pero segun e Bureau Integriteit Aruba integridad ta cuminsa cu cumplimento cu leynan. 

 

Y den Parlamento Hulandes ta reina e pensamento cu pronto nos lo mester haya un intervencion Hulandes, mirando cu Aruba, lesa gabinete Wever-Croes, no ta cumpli e.o

cu entrega di un presupuesto manera stipula pa ley y ni kier cumpli cu loke a keda cumbini na november 2018. Defacto gobierno di Aruba, den e acuerdo aki a haci Parlamento di Aruba un “aanhangsel” di gobierno di Reino.

 

Loke tambe ta surgi ta e posicion ambivalente di sigur e partido mas grandi di coalicion. Segun lider di fraccion di MEP awe den Parlamento, nos por papia cu e “crisis constitucional” a cuminsa na 2015, na momento cu CAFT a wordo imponí. Tambe e ta bisa cu kizas a bira tempo pa nos wak den un otro direccion pa un relacion nobo, cu no ta Hulanda. 

Pero na 2014 tanto partido MEP como partido PDR di Andin Bikker tabata pensa diferente. “Oppositiepartijen MEP en PDR zijn NIET verrast door de stelling van de Nederlandse minister van Koninkrijksrelaties Ronald Plasterk, dat de aanwijzing van de gouverneur van Aruba RECHTMATIG is en GEEN INBREUK doet op de AUTONOMIE.”, segun fuente noticiero NTR e tempo ey.

E tempo ey segun lider di MEP Evelyn Wever-Croes, MEP ta rechasa e actitud ofensivo di Mike Eman su partido pa cu Hulanda y ta kere cu mester pone atencion na soluciona, manera hende grandi, e problema financiero cu ta afecta nos pais. Igual pensamento Andin Bikker tabata tin e tempo ey na momento cu el a indica cu AVP ta perde mucho tempo pa wak e procedura con un KB ta bin na vigor, enbes di wak e signal cu Hulanda kier a duna pa loke ta e debe grandi y astronomico cu gobierno di Mike Eman a crea den un par di aña. Pues e tempo ey de facto a braza e binimento di CAFT.

 

Otro punto di ambivalencia ta e cu segun Koninkrijksrelatie Nu, presidente di Parlamento ta mira cu tur cos lo por wordo soluciona, si Hulanda acepta pa duna Aruba un “zachte lening”. Pero  durante tratamento di e ley di Laft ultimo den Parlamento, lider di fraccion di MEP a bisa bon cla, cu Hulanda por keda cu su “zachte lening” numa, en bes di bin pone asina tanto presion ariba Aruba.

 

Awor postura a cambia pasobra a cambia di posicion? Awor en bes cu sigui e pensamento na 2014 di lider di MEP, esta di bisti bachi y bay papia cu Hulanda, lider di fraccion di MEP ta menaza Hulanda cu nos mester wak den otro direccion, p.e. Merca, pa un otro relacion, lubidando cu LOKE MESTER TIN ta BON GOBERNACION!  Y esey parce di ta dificil, sigur mirando cu no a cumpli atrobe cu entrega un presupuesto na tempo! Y ta keda anuncia proyectonan cu ta keda hinca nos den mas debe. Mientras pa tur cos chikito mester tin show y fiesta! Ta sigui nombra hende y crea mas departamento of bureaunan, pa asina hinca mas hende. Pues e mesun cantaleta di e 8 añanan di gobernacion desastroso e gabinete AVPOR encabeza pa Mike Eman, parce ta sigui bou di e gobierno POREDmep  actual. Y aki ta unda cu nos mes ta mustra falta di madurez, ya cu parce cu nos no kier cambia nos posicion y di berdad actua segun reglanan di Bon Gobernacion. Y esaki no pa complace Hulanda, sino pa nos mesun bon.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio