Diadomingo prome di september a tuma luga e encuentro cu voluntarionan 2019 organisa pa partido AVP. E evento aki a carga e titulo di ‘Un causa comun,’ cual a conta cu asistencia grandi di voluntarionan, sostenedornan y activistanan di partido AVP. Varios miembro di partido AVP a dirigi mensahenan na voluntarionan cu a bin scucha e rumbo cu partido ta bayendo, e vision cu tin pa transforma un situacion destroso cu ta wordo crea pa dos aña caba y asina trece trankilidad y prosperidad bek den pueblo.
Un di e oradornan aki tabata e politico y miembro di Parlamento, mr. drs Richard Arends kende a repasa varios aspecto di e vision di partido AVP y tur loke tanto e partido como su persona ta kere aden y para pa esaki.
Parlamentario Arends a mustra tur presente cu candidatonan riba e lista politico berde, AVP, semper ta boga pa di un forma of otro di ta un inspiracion pa otronan, sea miembronan, activistanan, sostenedornan y voluntarionan.
“Partido AVP ta conoci pa ta un partido inspirativo. Un partido cu ta atrae hoben y grandinan pa su pensamentonan nobo, pa su ideanan inovativo cu ta sirbi como inspiracion pa hopi,” e la cuminsa bisando. Durante su discursco Arends a reitera cu un partido mester ta basa riba un ideologia y no riba pragmatismo. E la reafirma cu e ta kere firmemente den e fundamentonan di e ideologia social-cristian cu e partido ta basa riba dje; den un responsabilidad comparti unda cu Gobierno ta mantene su mes na su tareanan propio; den un husticia social unda e ciudadano ta sinti su mes protehi door di Gobierno y den solidaridad den nos sociedad unda nos ta comparti e peso, pero tambe e prosperidad. Segun Richard Arends un di principionan di mas importante ta e responsabilidad di garantiza un bienestar duradero pa generacionan cu ta bin manehando nos recursonan di un manera responsabel.
Sr. Arends a sigui bisa cu “e mesun principionan social-cristian aki ta riba cua AVP ta hiba politica y delinea maneho.E mesun principionan aki ta forma e base di tur trabou boluntario sin excepcion.” E la motiva e volutarionan presente reconociendoe principionan riba cual nan ta hasi nan trabow, bin pa dilanti, pone nan mes disponibel y te hasta tuma riesgo den un pais politicamente polarisa.
Den nomber di partido AVP Sr. Arends a gradici tur voluntario presenta pa nan labor. “Boso compromiso di semper ta indispensabel pa nos. Sin boso, nos lo no ta akinan aworaki. Boso dedicacion y determinacion pa yuda nos hiba nos Pais dilanti, ta e motor di nos partido. Sin un meta, un soño, sin un obhetivo nos ta bashi, nos ta sin contenido,” Parlamentario Richard Arends a trece dilanti.