Diadomingo nos pueblo por a gosa di un grandioso fiesta cultural na Centro di Bario Brazil na unda cu a tuma luga e di 4 Bariofest. Bariofest ta un proyecto di Special Projects bou guia di señora Susanne Van Nes Sinjago y ta resorta directamente bou di Ministerio di Asuntonan Social. Special Projects pa e ocacion aki, ta duna oportunidad na pueblo pa nomina baluartenan, personanan cu a resalta den comunidad. Y durante Bariofest, e personanan aki ta wordo reconoci. Den nomber di Minister Glenbert F. Croes, Prome Minister a entrega certificadonan di reconocemento na 5 baluarte di Brazil: Angelo Richardson, Giandrick van den Berg, Luis Inario Maduro, Heintje Ras y Vicente Ras. Cada nominado a resalta den diferente area. Prome Minister, tur dia den e siman aki lo elabora riba un nomidado siguiendo awe cu e hoben Giandrick van de Berg.
Giandrick van de Berg ta un hoben cu a destaca den deporte den U11 y U13, y awor cu su 14 aña ta reforsando U17. Giandrick a cuminsa hunga futbol cu apenas 4 aña y como keeper. Aunke cu su deseo semper tawata pa hunga den veld mes, ta te cu su 11 aña el a haya e oportunidad ey y a cuminsa reforsa U11 y U13. Den mesun aña el a forma parti di seleccion. Giandrick aworaki cu 14 aña ta den U17. Giandrick recientemente a ricibi e reconocemento Balon D’or 2019.
Giandrick van de Berg ta un hoben ehemplar den nos comunidad. Un hoben cu ta demostra na su edad jong cu perseverancia por logra yega na unda e ta desea di yega. Un hoben cu metanan grandi su dilanti. Y cu amor, perseverancia y determinacion ta bayendo tras di su soñonan.
Den nomber di Gobierno di Aruba y Minister Glenbert Croes, Prome Minister a felicita cu su nominacion y a gradici Giandrick pa ta un ehempel pa demas hobennan di nos pais.
