Minister Rudy Lampe ta encurasha mayornan riba e oportunidad pa nan yiunan participa na e concurso di pintamento cu e comision di e plan nacional a organisa pa conscientisa nos muchanan riba e importancia di stima bestia. E mandatario di Enseñansa a expresa cu Aruba ta enfrentando retonan riba nivel internacional pa cu e problematica di cachonan riba caya.
E tema di e concurso di pintamento aki ta “STIMA BO CACHO” y e premionan na e ganadornan lo ser entrega dia 4 di oktober 2019, riba dia di bestia. E concurso aki ta pa tur muchanan den scol basico di 6-12 aña cu e meta pa siñanan mas di Aruba su ‘Ley di Cacho’. Di chikito caba nos muchanan mester siña manera e dicho na Hulandes ta bisa: “klein geleerd, groot gedaan”. Educando nos muchanan ta crea un base solido di doñonan cu ta cuida nan mascotanan di forma responsabel. Alabes ta stimula adultonan pa forma parti di e educacion di e forma aki ora nan yuda splica e mucha algun punto basico di e ‘Ley di Cacho’.
Participacion ta gratis. Pa participa, “download” e formulario na specialprojectsaruba.org. E pintura mester ta uno original y creativo, y mester tin contenido cu ta ilustra un of algun di e puntonan di e ‘Ley di Cacho’. Esnan cu participa por scoge den tres tema pa ilustra: (1) cacho den cura, (2) cana cu cacho na un “leash”, (3) cacho na su veterinario.
Ultimo dia pa entrega e pintura ta diaranson 25 di september 2019 na e MFA mas cerca, via e maestranan of via email: [email protected].
Minister Rudy Lampe ta extende un invitacion na tur nos muchanan den scol basico pa sea creativo y uni nan mes na e concurso aki cual ta di suma importancia pa e educacion di nos muchanan evitando asina e problematica di cacho den futuro cu actualmente ta dañando Aruba su imagen riba nivel internacional.
