Bunita parada cultural Dia di Brazil 2019: Minister Xiomara Ruiz-Maduro a disfruta cu e pueblo banda di caminda di un dushi ambiente

ORANJESTAD – Diadomingo for di oranan di tempran di atardi por a tuma nota cu e pueblo a cuminsa yega den e cayanan di Brazil pa asina haya un bon luga pa por mira y aprecia e grandioso Parada Cultural relaciona cu Celebracion di Dia di Brazil 2019. Minister di Cultura Sra. Xiomara Ruiz-Maduro tabata presente y a wordo bon ricibi pa e publico, e mandatario a pasa saluda chikito y grandi cu tabata para banda di caminda. Por a mira famia y amistadnan presente cu a disfruta bailando y gozando di un dushi y bunita parada cultural yen di ambiente cu a inicia banda di 3 or di atardi saliendo for di Centro di Bario Brazil pasa den caya Bernadina Growell, Noord Cura Cabay, Rooi Koochi, Mabon y termina bek na Centro di Bario Brazil. E mandatario a keda masha contento cu pueblo a responde den grandi y a sostene y apoya e bunita celebracion cultural aki.