Parlamento siman pasa a finalisa e debate relaciona cu e relato financiero di e prome mitadi aña 2019. Gobierno a duna informacion tocante e situacion financiero, cu ta desaroyando positivamente pa loke ta e gasto y entradanan di nos pais. Tambe a duna informacion riba e vision economico, y crecemento economico cu ta premira di ta 2.4% e aña aki, 3% otro aña y 3.2% na 2021, esaki debi na e exito den turismo, mirando cu e cantidad di turista den e prome mita di aña a aumenta cu 8.2%. Esaki ta trece cucne cu desempleo ta bahando, manera a keda demostra cu e cifranan di Departamento di Labor, di 8.9% pa 7.3%. Ademas, tanto IMF como Standard & Poors a duna Aruba un evaluacion positivo. Tur esaki ta duna nos e confiansa cu nos lo logra crea progreso pa nos pais.
E temporada di orcan a cuminsa na juni y ta sigui te cu november. Apesar cu nos pais ta bendiciona y mayoria di biaha no ta wordo afecta pa orcan, no ta kita afo cu nos mester prepara. Miho prepara bo ta, mas lihe bo ta recupera despues di un calamidad asina. P’esey Gobierno di Aruba ta sostene y ta aprecia e esfuerso conhunto cu tur departamento y instancia cu a participa activamente den e training nacional pa temporada di orcan, cu a finalisa siman pasa. Aruba como pais ta prepara, y aki aya ainda tin algun aspecto pa mehora. Awor ta na cada famia pa prepara den nan hogar.
Premier Wever-Croes a ricibi Samira Rafaela, e prome Parlamentario den Parlamento Europeo di desendencia Caribense, y a pone e bienestar di Aruba, Boneiro y Corsou halto riba su agenda. Den e cuadro aki el a bishita Aruba pa mira e proyectonan cu Union Europeo ta financia na Aruba, y pa scucha di Gobierno di Aruba con Union Europeo por yuda mas. Indudablemente un area cu mester di mas atencion ta e crisis di Venezuela pa mira con Union Europeo ta dispuesto pa yuda den esaki.
Parlamento siman pasa a yama un reunion publico y a invita Premier Evelyn Wever-Croes pa debate riba e topico di integridad. Esaki a rais di tur e informacionnan cu a Sali recientemente di e compania estatal RdA, y especialmente e rol cu actual parlamentarionan a hunga den esaki. Durante e reunion Premier Evelyn Wever-Croes a enfatisa e importancia di e trayectoria di integridad. El a elabora riba e plannan y vision di Gobierno di Aruba den esaki, y ta contento di por constata cu Parlamento ta sostene e vision aki di Gobierno. Premier ta aplaudi cu Parlamento ta trata e tema importante aki, y mas aun cu Parlamento mes ta duna su aporte pa nos por finalisa e trayectoria aki mas lihe cu ta posibel. Nos pueblo merece un pais integro, y integridad den nos pais ta cuminsa cerca e politiconan. Ban duna e bon ehempel!
Siman pasa Premier Evelyn Wever-Croes a hiba palabra na occasion di despedida di CEO di AAA sr. Fazio y brinda bon bini na e CEO nobo sr. Meijs. Den su discurso Premier a subraya e decision strategico asina importante cu e minister encarga cu turismo na 2004, sr. Edison Briesen, a tuma pa cera e partnership cu Schiphol Groep. Hunto cu Schiphol Groep y AAA a hiba nos aeropuerto na e siguiente nivel, y awe nos por bisa cu siguridad cu e vision strategico di Gobierno di sr. Nelson Oduber na 2004, tabata un bon vision. Awor AAA ta den pleno ehecucion di e proyecto di $300 miyon “Gateway 2030”, cu lo genera crecemento economico, lo genera cupo di empleo y lo haci di nos aeropuerto E hub den nos region. Premier a gradici sr. Fazio den nomber di Gobierno di Aruba y a yama bon bini na sr. Meijs.
Premier Evelyn Wever-Croes hunto cu Minister Rudy Lampe a ricibi bishita di Arubaanse Padvindsters Gilde APG den cuadro di e di 4 aña consecutivo di e Gold Leadership Development Program. E programa aki ta un obsekio di “Girl Guide Organisation” di Inglatera, cu meta pa yuda cu e desaroyo di lidernan di mucha muhenan den nos comunidad. Gobierno di Aruba ta sostene e desaroyo di nos mucha muhenan di edad jong, pa asina crea mas lider femenino na Aruba y crea igualdad den oportunidadnan di tur nos muchanan, mucha homber y mucha muhe.
Den nomber di Gobierno di Aruba Premier Evelyn Wever-Croes a duna reconocemento di excelencia na sr. Ronchi de Cuba pa su trayectoria di 30 aña impresionante den mundo di moda na Aruba, ‘30 years of style’. Premier Evelyn Wever-Croes a remarca cu locual a hala su atencion ta cu den cada paso di exito di Ronchi, semper el a envolve hopi hende, y awe ta mira atras riba un ekipo grandi di modelo desde 1989 pa awor, y un ekipo di produccion grandi cu ta hunto cu Ronchi celebrando 30 aña den moda. Pabien Ronchi.
Presidente di Comision Fiho di Parlamento di Hulanda Sr. Jan Paternotte (D66) conhuntamente cu e miembro di comision Sra. Attje Kuikens (PVDA) a ricibi e raportahe di Crisisplan Social for di man di Minister Glenbert Croes kende a expresa su gratitud cu apesar di ta reces cu toch a saca tempo pa ricibi e delegacion di Aruba.
College voor de Rechten van de Mens ta un Colegio masha respeta na Hulanda. E Colegio aki su bos tin poder. Aki tambe Minister Glenbert Croes a presenta y entrega e raportahe di e Crisisplan Social.
CAFT su Presidente Sr. Raymond Gradus tambe a ricibi for di Minister Glenbert Croes e raportahe di e Crisisplan Social. Un raportahe amplio ya cu ta e mandatario di Aruba su opinion cu e berdad y transparencia bo ta logra mas.
Raad van State su Vice Presidente Sr. Thom de Graaf, e Staatsraad di Aruba Sra. Milly Schwengle como tambe Sr. Rob Visser y Sr.Ron van der Veer a ricibi Minister Glenbert Croes pa por scucha y ricibi e raportahe di e Crisisplan Social di Aruba.
E mandatario tabatin e grato placer di conoce e Staatsraad pa y di nos isla ruman St. Maarten. A intercambia di idea- y metanan den presencia di e Staatsraad pa Aruba, Sra. Milly Schwengle. Den esfuerso conhunto por logra mas pa nos respectivo Paisnan.
Sra. Linda Terpstra di Stichting FIER tambe a ricibi e raportahe di e Crisisplan Social for di Minister Glenbert Croes. Stichting FIER ta un ayudo importante den Aruba su lucha contra violencia domestico.
Kinderombudsman di Hulanda, Sra. Margrite Kalverboer a keda impresiona cu e Crisisplan Social di Aruba. A keda contento cu siguridad di nos criaturanan ta prioridad pa Gabinete Wever-Croes
Sr. Henk Brons e director general di Relacionnan di Reino a ricibi e raportahe di Crisisplan Social for di mannan di Minister Glenbert Croes. Durante e encuentro aki e mandatario a enfatisa cu apesar cu Gobierno di Aruba ta haciendo un ehercicio sobre-humano pa sanea e situacion financiero di Pais Aruba cu a hereda, pa por rescat’e dje abismo den cual awor e ta encontra, cu asina mes Gabinete Wever Croes ta keda comprometi na hende, hibando un maneho unda e ser humano ta central y tin prioridad, e.o. cu implementacion di e Crisisplan Social.
Cu e vision di empodera e ser humano cu su propio forsa, Minister Glenbert Croes a culmina su biahe di trabou cu un bishita na Sr. Rob Pagée na Amsterdam cu a presenta na e mandatario su iniciativa particular ‘Eigen Kracht’
Dialuna atardi na Surfside Marina, Minister di Husticia mr. Andin Bikker tabatin un seccion di pregunta y contesta cu representantenan di como 16 compania cu a mustra interes despues cu a publica e proceso di Request for Expression of Interest pa construccion di un KIA nobo. Minister Bikker tabata hopi contento y gradicido pasobra esaki ta mustra cu tin interes enorme pa yuda pais Aruba. Minister Bikker tin e speransa cu pronto lo por spera un of mas propuesta den cuadro di e proceso inicia, cu solucionnan cu ta pas den e cuadro financiero, pa asina lo por yega na realisacion di un KIA nobo.
Diamars mainta Minister Bikker a haya noticia cu rumannan Ramirez cu a huy di KIA a keda deteni pa Recherche di San Nicolas. E detencion a tuma luga na un cas na Macuarima. Minister Bikker a felicita Cuerpo Policial cu nan bon trabou y perseverancia pa captura e fugitivonan aki.
Diamars tambe Minister Bikker a reuni y cera conoci cu representantenan di NCTV di Hulanda kendenan tabata acompaña pa NCTVI di Aruba. E reunion tabata den cuadro di ‘cyber security’ y e cambionan di ley cu Minister Bikker ta trahando riba dje pa loke ta e sistema di ‘grenscontrole’ via APIS y PNR. Minister tabata hopi contento di por a reuni cu e representantenan di NCTV pa sa mas di nan trabou y posibilidad di cooperacion. Pronto Aruba lo yega na e sistema di Advance Passenger Information y Passenger Name Record, cu ta sistemanan cu ta controla hendenan cu ta riba cierto ‘watchlist’ y evita pa nan drenta Aruba.
Diaranson Gobierno a continua cu e debate den Parlamento riba e relato financiero di prome mita di aña. Minister Bikker a mustra su gratitud na Parlamento cu for di un principio a bin ta comparti su preocupacion pa loke ta e situacion di KIA y na mesun momento Parlamento a contribui cu un solucion pa medio di un mocion. Den e mocion Parlamento a haci un apelacion na Gobierno pa den nan ministerio yuda aloca fondonan necesario pa salvaguardia e siguridad di e infrastructura di KIA. Na final di e reunion e mocion a keda aproba door di tur 11 Parlamentario presente.
Diabierna mainta Minister Bikker tabata presente na Scol di Polis E.J. Watty Vos, pa huramenta como tambe haci entrega di certificado y diploma na 77 Polis. Den cuadro di e programa di gobernacion di Gabinete Wever Croes a pone enfasis pa yega na mas visibilidad policial riba caya y den cuadro di esaki a haciendo tur esfuerso, no obstante e retonan financiero, pa pais Aruba yega na mas polis y asina a cuminsa cu klas nobo di aspirant agenten. Minister Bikker a felicita tur Polis y a expresa di ta orguyoso cu nan logro.
Minister di Turismo tabata den Parlamento na unda a aproba unanimamente e presupuesto 2019 di Tourism Product Enhancement Fund (TPEF). E fondonan di e presupuesto aki lo wordo destina den:
Boardwalk Malmok Fase 2
Proyecto artistico Hooiberg
Proyecto Trapi Mangel Halto
Sponsorship Fundacion Stimami Sterilisami
Limpiesa den areanan di costa
Bouyes
“Prevencion mester bira parti di e cultura di nos comunidad”
Sin e salud adecua, dificilmente como persona bo ta haya e oportunidad pa logra algo. Pa e motibo aki, e ta esencial cu manera un comunidad, e mester ta parti di nos cultura pa tuma pasonan preventivo pa por tin un salud adecua. Esaki no solamente ta hiba na un miho calidad di bida, sino cu e ta yuda grandemente den reduci gastonan medico, cual no ta un secreto cu hopi gasto ta ser haci pa coregi problemanan cu ta bin como resultado di no hiba un bida saludabel.
Minister Dangui Oduber, como mandatario encarga cu salubridad publico ta kere fielmente den hiba un maneho basa riba prevencion. Ya caba casi den inicio di gobernacion, e mandatario a traha conhuntamente cu tur stakeholder riba un plan nacional di prevencion. Pa haci e plan aki uno realisabel, Pais Aruba a haya asistencia tecnico for di PAHO (Pan American Health Organization).
E di 3 edicion di e evento di Island Fest a wordo bishita un biaha mas masalmente diaranson ultimo. Tanto turista como local por a gosa di un anochi yena di un ambiente caluroso, demostrando e exito grandi di e evento aki.
E evento di Island Fest ta un concepto nobo y completamente diferente. Su meta principal ta pa trece un trafico di turista pa p’ariba di brug cu normalmente lo keda solamente na e parti p’abou di brug. Durante cada evento di Island Fest, e turistanan por experencia pa nan mes e historia, cultura, cuminda y artesania di Aruba, contribuyendo di e forma aki na experencia di calidad halto na nos bishitantenan.
Minister Dangui Oduber tambe tabata presente y a mustra su satisfaccion pa loke ta e crecemento di e festival. E mandatario a splica cu e evento aki ta demostra cu San Nicolas tin hopi pa ofrece y cu un evento asina ta aporta grandemente na e economia di San Nicolas.
Pueblo en general ta keda cordialmente invita pa forma parti di e proximo edicion di Island Fest, unda nos tur hunto por demostra e ambiente caluroso unico cu Aruba tin pa ofrece na su bishitantenan.
Minister di enseñansa a habri e siman cu e presentacion di e Bijbel pa mucha na papiamento di Aruba destina pa nos scolnan preparatorio. Cu introduccion di Scol Arubano Multilingual den tur scol preparatorio unda Papiamento ta e idioma di instruccion esaki ta bira literatura obligatorio pa tur scol preparatorio.
A cera e siman cu e Drielandenoverleg via videoconference cu e Ministernan di Educacion di Aruba, Corsou y St. Maarten pa prepara e Unesco General Conference na Parijs cu lo tuma luga na november proximo. A keda disidi cu Aruba lo ta e sede den 2020 di e Vierlandenoverleg cu participacion ademas di Hulanda. Lo estrena asina e JFK Centre cu un conferencia di e indole aki.
Y den siman Minister di Educacion a sigui apoya e infrastructura cu tabata falta pa tur scol ta drei den e aña escolar nobo.
Diamars Minister Ruiz Maduro a atende e di XI Council of Ministers Meeting di CFATF na Miami. CFATF ta e organisacion regional cu ta percura pa e Paisnan miembro por ta protehi contra labamento di placa y financiamento di terorismo manera stipula den e recomendacionnan di e organisacion mundial Financial Action Task Force (FATF).
Meta di e reunion aki ta pa tuma e desicionnan necesario pa asina e Secretariado di CFATF por funciona debidamente den aña 2020 en adelante. Durante e reunion a aproba e programa di e Presidente entrante den representacion di Antigua & Barbuda. Tambe a aproba e presupuesto pa 2020 pa CFATF. Un punto di agenda importante cu tambe a ser trata, ta e schedule di Evaluacion Mutuo di e Paisnan miembro. Aruba su evaluacion ta riba agenda pa e tercer cuartal di 2020 y ya caba preparacionnan ta tumando luga pa e evaluacion importante aki.
Aruba ta un di e prome Paisnan den Caribe cu ta afilia na CFATF y semper a participa activamente na e trabou importante cu CFATF ta haci pa mantene e integridad di e sistema financiero di nos Pais.
Minister Ruiz-Maduro a reuni cu e Comision di Reforma Fiscal cu ta trahando pa asina Aruba por yega na un sistema fiscal simpel y husto. Otro siman diaranson dia 4 di september y diahuebs dia 5 di september lo tin un reunion cu tur ‘stakeholders’ pa asina informa riba e cambionan cu ta wordo propone den e di dos fase di e Reforma Fiscal cu lo drenta na vigor riba 1 januari 2020. Den e seccionnan aki cu lo wordo organisa lo brinda informacion pa asina wak con hunto nos por yega na un sistema fiscal simpel y husto pa Pais Aruba.