Oranjestad, Aruba – Un proceso cu un duracion di aproximadamente 2 aña, awe den precencia di Minister di Infrastructura, Medio Ambiente, y Desaroyo Teritorial, Sr. Otmar Oduber y Notario Taekema hunto cu directiva y conseho di supervision di Fundacion Parke Nacional Aruba (FPNA) a yega na finalisa e traspaso pa FPNA di tereno priva na Boca Prins.
Cumpliendo cu e statuut, FPNA, na mes momento a entrega e tereno aki na Gobierno di Aruba. Gobierno di Aruba na su turno lo asigna e tereno aki como un area protehi bou maneho di FPNA. E traspaso di e tereno di Boca Prins ta e prome tereno priva cu FPNA a logra obtene. Directiva di FPNA lo sigi sondia posibilidad pa continua adquiri otro terenonan priva situa den Parke Nacional Arikok.
Directiva di FPNA, Sr. Roland de Cuba (CEO) y Sra. Natasha Silva (CCO) ta sumamente contento cu e manera cu a yega na e logro aki.
Negociacionan cu e doño di e tereno na tur momento a bay den bon esfera y por a traha na un manera dinamico cu oficina di minister pa logra e transpaso simultaneo pa Gobierno di Aruba. Sr. De Cuba ta expresa su confiansa cu Gobierno di Aruba, den un manera acelera, lo cumpli cu e requisitonan necesario pa designa e tereno di Boca Prins bou di maneho y proteccion di FPNA. Por ultimo, Sr. De Cuba ta hopi agradici na tur cu a aporta na e proceso aki, sin e bon sosten di nos consehero huridico y conseho di supervision lo no a yega na e exito aki.
Boca Prins Restaurant entre tanto ta sera te cu un proximo aviso.