Cumpliendo cu peticion di Parlamento na cuminsamento di gobernacion, Gobierno di Aruba e siman aki atrobe a presenta na Parlamento pa duna cuenta riba e situacion financiero di Aruba riba e prome mita di 2019. Den historia, esaki ta e prome biaha cu esaki ta pasa cu Gobierno ta duna cuenta na Parlamento mita di aña. Esaki, Prome Minister Evelyn Wever-Croes a expresa cu ta hopi importante y pa Parlamento hopi necesario pa haya e informacion aki pa asina nan haci cu nan trabou miho posibel.
Ta di lamenta si cu oposicion ta tuma un comportacion hopi infantil y hopi iresponsabel y a dicidi di no asisti na e reunionnan mientras cu esaki ta parti hopi importante di nan trabou. Apesar di ausencia iresponsabel di oposicion, Prome Minister a elogia e bon nivel di e reunionnan demostrando responsabilidad financiero, curashi y transparencia. E prome mandatario di nos pais a felicita e Fraccionnan den Parlamento cu si ta tuma su trabou asina na serio, hasta ta haci trabou di oposicion tambe.
“Un Parlamento critico, al caso, cu ta preocupa pa e bienestar di nos pais. Aruba por ta orguyoso di nos Parlamento. Ohala cu nos tabatin un Parlamento asina durante 2009 pa 2017, lo awe nos pueblo no ta den e sufrimento aki. Sufrimento pasobra costo di bida ta haltisimo; pasobra e peso di impuesto ta halto; pasobra desempleo, maske cu el a baha, ainda tin hopi desempleo.
Desde su inicio, Gobierno a establece e punto di salida: ‘Pone e ser humano central’. Pues, e interes general di pueblo di Aruba ta na prome luga. Pa cu e prioridadnan di Gobierno, tambe ta tene cuenta, entre otro cu e Obhetivonan di Desaroyo Sostenibel (SDG’s) cu ta wordo utilisa door di Nacionnan Uni. E 17 “Obhetivonan di Desaroyo Sostenibel” a wordo estableci pa ‘haci e mundo un miho luga pa 2030’. E obhetivonan aki lo ta manera un hilo cora den e politica general di Gabinete Wever-Croes y lo sirbi como punto di salida pa e accionnan di Gobierno”, Prome Minister Evelyn Wever-Croes a duna di conoce.