ORANJESTAD – Durante e siman aki Parlamento di Aruba a trata un biaha mas e presupuesto pa aña 2019 di loke ta e Tourism Product Enhancement Fund (TPEF). E fondo aki, cual a ser estableci na 2010, su meta ta pa inverti, embeyece y desaroya Aruba como producto turistico.
Minister Dangui Oduber, como mandatario encarga cu turismo a splica cu e aprobacion di e presupuesto aki ta refleha e confiansa cu tin den e maneho di turismo. Ademas e mandatario a pone enfasis cu e ‘producto Aruba’ ta beneficiando di esaki, hibando Aruba na un nivel di turismo di calidad excepcional. E mandatario a splica durante su splicacion na Parlamento cu su vision como mandatario ta pa eleva e calidad di Turismo, eleva producto Aruba, pa eleva e nivel di servicio cu nos ta duna. E calidad aki ta bin solamente door di duna e turista e miho dibo, y pa Aruba esey ta e experencia unico cu nos isla ta ofrece.
Proyectonan 2019
Durante aña 2019 a sigui cu e inversion pa loke ta e fase 2 di e ‘Malmok Boardwalk’ cu ta cuminsa na Ritz Carlton y ta termina na e crusada di Malmok. A pusha pa continua cu e proyecto di ‘Stimami Sterilisami, cual awor a bira oficialmente un fundacion. Mester remarca cu turistanan tin hopi atencion na e manera con Aruba ta atende cu e problematica aki y e proyecto ta contribui cu mas di 5000 sterilisacion di cacho y pushi pa aña. Ademas a logra pa Censo 2020 inclui un database di cacho y pushi na Aruba.
Ya caba den 2018 a pone e meta pa traha riba embeyecemento di areanan turistico, door di percura pa e mantencion debido di e infrastructura y paisahe. Pa 2019 a logra cera un partnership cu ATA unda lo percura pa e bouynan den lama wordo cambia y manteni. Esaki ta encera e zonanan di Palm Beach (area di hotel), Baby Beach, Arashi y Malmok. Pa por mantene costa di Aruba limpi y ordena, a introduci un asina yama ‘TPEF Ploeg’, cu ta keda responsabel pa esaki. Finalmente tambe a aproba e renobacion di e trapinan na Mangel Halto como tambe e dos piernan na Rodger’s Beach.
Minister Dangui Oduber a expresa cu gran satisfaccion tur loke e fondo aki ta logrando y e tin tur confiasa cu e fondo di TPEF lo sigui sirbi pa engrandece nos producto Aruba. El a gradici e board di TPEF cu a traha riba e presupuesto, cual ta consisti di e miembronan Mario Arends, Astrid Muller, Joe Najjar, Sjeidy Feliciano, Curtis Fraser, Jouel Croes y Sharlyze Romano.
“Cooperacion y vision, den combinacion cu un maneho na unda Aruba ta prome luga, ta demostra cu nos tur como pais ta beneficia di e frutonan”, Minister Dangui Oduber a expresa na final.