E siman aki dia 27 di augustus 2019, Banco Central a publica un rapport cu ta encera resultado di un encuesta haci riba e topico di corupcion den aña 2018. Pa e encuesta aki, e organisacion a puntra comunidad nan percepcion riba corupcion na Aruba pa e aña. Como Minister di Desaroyo Teritorial, Infrastructura y Medio Ambiente, Otmar Oduber a haye importante pa para unrato keto na e resultado aki.
Na momento cu Gobierno actual a asumi responsabilidad na November 2017, e studio haci pa Banco Central practicamente a inicia. A refleha e tempo ey riba decisionnan cu mester a tuma di para tur tramite cu tabata andando den e departamento di DIP pa loke ta otorgamento di tereno. Den e rapport, e tres organisacionan/departamentonan persibi den comunidad como sitio cu mas corupcion ta tuma luga ta otorgamento di permisonan di trabou, otorgamento di permiso di Dimas y otorgamento di tereno. Esaki ta comproba locual cu a bin ta bisa desde inicio di Gobernacion y ta e motibo pa cual a bin cu maneho nobo tambe desde mei 2018 pa loke ta otorgamento di tereno. Pues manera menciona anteriormente, na November e prome decision tuma tabata pa para tur transaccion tumando luga, a para tur akte pendiente na Notario y conhuntamente cu un management team na DIP, a percura pa rapport wordo traha, caminda cu a mira cu e proceso di toma di decision tabata sosode totalmente robes. Pa cual a inicia ehecuta un maneho nobo na mei, un maneho transparente, publica pa comunidad sa e proceso, pa por yega na un tereno pa vivienda of comercial.
A percura pa un maneho transparente pa tur hende, pero como e Mandatario encarga cu DIP, Minister Oduber a percura tambe pa kita for di e pensamento y custumber di comunidad, caminda cu mester a reuni na mesa di e Minister pa yega na remarca pa un tereno.
E rapport di Banco Central ta hopi duidelijk, segun e resultadonan di e encuesta, residentenan tabata di opinion cu e problema di corupcion tabata hopi comun y creciente, pero nan tabata cla y dispuesto pa yuda den e lucha contra corupcion. Tambe e resultadonan a mustra cu actonan di soborno na Aruba ta abou, esta cu poco persona tabatin aceso na esaki ora tabatin acceso na servicionan publico den e 12 lunanan studia. Esaki ta refleha e trabou cu enfoke riba transparencia y integridad cu Gabinete Wever – Croes a bin ta pone enfasis riba dje.