Cu hopi pena Partido MEP a tuma nota di fayecimento dia 22 di augustus 2019 di dr. Juan (Juni) de Cuba. Di profesion medico y specialista dr. de Cuba a traha durante hopi aña riba su isla natal atendiendo su pashentnan cu e amor y cariño cu a caracterisa su persona.
Sin duda cu MEP tambe tabatin e previlegio pa comparti durante un periodo cu presencia di dr. de Cuba den su seno. Tabata den aña di eleccion 1985 cu nos lider inmortal Betico Croes a acerca dr. de Cuba pa subi como candidato nr. 17 riba lista di MEP y esaki debi na su capacidad, dedicacion y su amor patrio.
Awe na un edad relativamente hoben dr. Juni de Cuba a bandona e mundo aki.
Partido MEP ta manda palabra di profundo condolencia na su señora, su yiunan y demas famia cu e perdida tan grandi aki. Cu dr. Juni de Cuba sosega na paz den brasa di Señor.