Lo enfoca riba e tema di sostenibilidad
Minister di Desaroyo Sostenibel durante un conferencia di prensa a elabora riba SES (Sustainable Education Symposium) cu lo inicia otro siman dia 4 di september, 2019. E simposio aki a cuminsa 8 aña pasa como Green Symposium pero mirando e importancia di e palabra sostenibel, a tuma e decision di cambia e nomber pa Sustainable Education Symposium na unda e scolnan lo participa y enfoca riba e tema di sostenibilidad.
Minsiter Rudy Lampe a informa cu e tema e aña aki lo ta “Community Garden” Hofi di Bario. Esaki a bin na vigor na momento di un bishita cu Minister tawata tin na New York y a mira e proyecto aki como algo cu e lo desea di implementa na Aruba. Basicamente e meta di e tema aki ta pa e barionan na Aruba cuminsa haci uzo di espacionan publico cu no ta wordo uza pa plantacion. E proyecto aki lo ta di beneficio pa e bario ya cu lo tin un area berde, cu ta produci fruta y cu ta na encargo di e bario mes.
SES lo ta e manera perfecto pa stimula nos hobennan pa cu e importancia di agricultura mirando cu esaki ta un area cu Cabinete Wever-Croes lo desea di desaroya. E interes pa plantacion na Aruba tambe ta creciendo mas y mas y pa e motibo aki e simposionan ta di hopi importante pa asina por brinda informacion necesario na comunidad.
Hof’i Bario a resulta di ta un tema hopi interesante ya cu den Bijbel di Prenchi tambe ta menciona e palabra hofi cu ta e Hofi di Eden, e hofi di Adam cu Eva y e hofi di Dios p’esey dia 4 di september lo presenta e buki aki tambe.
Minister di Desaroyo Sostenibel ta invita henter comunidad di Aruba pa atende e SES dia 4 di september benidero na Cas di Cultura di 7:00 pm pa 9:30 pm. Lo bay tin diferente oradornan y productonan sostenibel local na benta. Entrada ta completamente gratis!