Parlamentario Endy Croes ta refuta cu Richard Arends su sentido comun a remord’e, consecuentemente Richard Arends a manda un carta cu e ta distancia su mes di e funcion CFO/ Directeur di RDA cu Richard Arends cu Mike de Meza a firma na 2016. Parlamentario Croes ta sigui bisa, si no ta pa e trabounan duro cu Parlamento a bin ta haci unda colega Edgard Vrolijk a logra yega na e contracto, nunca Aruba lo a logra desenmascara e grado di sinberguensa cu AVP ta practica.
Cayente a coy curpa
Manera a splica anteriormente Mike de Meza a firma tambe den un reunion extraordinario yama den pura den october 2017 – despues di eleccion – un verlof pa Richard Arends pa tur e tempo cu e lo bay ta den Parlamento y manera cu e no ta forma parti di Parlamento mas e lo continua cu e contracto di Afl. 22.375,- pa luna sin ningun problema. Esaki ta e esencia di e grado di sinberguensa con Mike Eman, Mike de Meza y AVP ta usa trikinan “stinki” pa acomoda nan hendenan. Richard Arends ta keda e wowo preto di Mike Eman. E contracto aki pa bo por a termin’e lo a costa Aruba 2.6 MIYON florin. Pueblo ta compronde cuanto famia kisas sin awa of coriente por a wordo yuda cu e placa aki? Awor cu cayente a coy nan curpa y documentonan a sali na claridad di dia Richard Arends a core distancia su mes di e contracto aki.
Hoos nan a hoos
Parlamentario Endy Croes ta spera cu Board di RDA anda diligentemente cu e asunto aki y percura pa yama Richard aden y lag’e firma pa su ontslag. AVP a tuma e pueblo aki haci di tal indole cu absolutamente no por confia nan mas. Tin biaha bo ta puntra bo mes ta con Candelaria por a join un partido asina? Candelaria ta bin di un educacion di polis y bo ta spera cu e lo tabata un persona integro. Pero na caminda nos por a nota cu Candelaria tambe a pega cu e “besmettelijke ziekte di AVP”, esta e virus di sinberguensa. Pakico ? Nos a splica caba con Candelaria tambe a subi lista style di “Hoos nos ta Hoos! Candelaria tambe tabata tin tur documento cla pa e bira Directeur na APA. Pues un mentalidad “putri” y totalmente robes. Pueblo, Aruba merece mihor. Unico compromiso nos mester haci ta nunca pero nunca mas AVP. Nos lo keda monitor e situacion y lo keda informa pueblo un pa un di tur e manipulacionnan di locual AVP a haci y pronto lo tende mas lo cay.
