Dianan 19 y 20 di augustus 2019 a cuminsa cu e reunionnan den Parlamento pa controla con Gobierno a ehecuta e presupuesto aproba den e prome 6 lunanan di aña 2019.
Ta pa di dos biaha cu e reunion aki ta tuma lugar y ta basa riba e mocion entrega pa nos Fraccion caminda nos a urgi Gobierno pa den augustus nan bin duna relato di e prome 6 lunanan di cada aña. No solamente pa nan presenta e cifranan pa loke ta trata gasto y entradanan real pero tambe pa Gobierno indica con nan ta bay reduci gastonan na un manera responsabel y structural. Na mes momento e reunion ta un momento ideal pa Gobierno elabora ariba implementacion y formacion di nan maneho. Intencion di e reunion no ta solamente pa controla gobierno, pero mes importante ta e echo cu nos tabata kier a evita cu na final di aña, Parlamento ta keda presenta cu e tristo realidad cu presupuesto a keda surpasa y cu mester aproba alocacion di mas fondo. Esaki sigur tabata algo usual bou di e gobierno anterior.
Despues di a analisa e uitvoeringsrapportage di prome y di dos kwartaal di e aña aki Shailiny Tromp-Lee ta indica cu nos ta riba e bon caminda. Esaki ta keda subraya tambe door di e rating agenciesnan. Entradanan di Pais Aruba ta manera premira y gastonan ta manera presupuesta (bou control). Alabes Aruba a ricibi rating di IMF positivo y Standaard and Poor’s stabiel. Cu otro palabra por keda conclui cu Gobierno a mantene su mes na e apoderacion duna pa Parlamento pa loke ta trata presupuesto 2019.
Un logro grandi di Gabinete Wever-Croes den un tempo hopi corto y bou un situacion hopi drastico. Un situacion caminda nan a hereda un desaster organisatorio, un Mega Debe mas halto cu tabata premira, un berdadero desaster financiero hamas bisto na Aruba. Un Aruba cu un deficit di 155 mln florin y un debe astronomico di mas cu 4 billion florin. Tromp-Lee ta indica cu e ta convenci cu esaki no tabata nada facil pa logra. Y mas cu claro durante e reunion menciona, Parlamentario Tromp-Lee a haci uso di e oportunidad pa gradici y felicita Gabinete Wever-Croes completo, principalmente Minister President y MinFec pa nan trabou asina grandi realisa pa nos pais. Sigur e cifranan presenta ta refleha e maneho responsabel cu Gabinete Wever-Croes a bin ta hibando.