Parlamentario Endy Croes a tuma nota cu colega Edgard Vrolijk a presenta den sala di Parlamento cu un contracto firma pa Richard Arthur Arends y Mike de Meza cual contracto ta representa un contracto di trabou cu Mike de Meza a firma pa Richard Arends bira e CFO/ Directeur Financiele en Juridische Zaken di Refineria di Aruba, esta RDA. E contracto aki ta vigente desde 1 di november 2016. Mesun momento Richard Arends a ricibi oportunidad como e wowo preto di Mike Eman pa bira Minister na lugar di Otmar Oduber kende a bandona AVP. Richard Arends no obstante tin un contracto MIYONARIO firma como Directeur Financiero esta CFO di RDA, Richard a dicidi pa laga e contracto vigente aki firma ta “idle” y a scoge pa bira Minister cu Mike Eman. Hoos AVP ta Hoos!
Richard mester saca su conclusion
Den eleccion 2017 AVP a haya un sota momento nan a bay atras cu 10 mil voto y Richard Arends su periodo cortico como Minister a termina. Sinembargo Richard Arends a haya e oportundidad e momento ey pa drenta Parlamento. Aki Richard Arends a pense bon y a inventa un triki pa laga Mike de Meza y Alvin Koolman firma den un notulen di un reunion extraordinario yama den pura 17 october 2017, pues casi 1 luna despues di eleccion y net 10 dia promer cu Richard Arends huramenta dilanti gobernador, lo siguiente,” Het buitengewoon en bijzonder verlof alsmede de ontheffing van verantwoordelijkheden zal duren tot de dag dat het lidmaatschap van de heer mr.drs.Richard Arthur Arends tot de Staten van Aruba eindigt.” Aki Richard Arends asabiendo cu e tin un contracto valido como (CFO) Directeur di RDA a misleid Parlamento den su totalidad usando “listige trucjes” y a gaña Parlamento cu e no ta dispone di ningun otro trabou. Richard Arends di AVP mester saca su conclusion y entrega su retiro per direct. Esaki ta inaceptabel. Richard Arends a huramenta dilanti Gobernador y Gobernador tambe a wordo engaña. Parlamentario Endy Croes ta sigui splica cu un hende decente cu tin honor, balor y dignidad mester acepta su eror y entrega su retiro cu un acto asina grave.
Hende tin suerte den bida
Parlamentario Endy Croes a sigui bisa momento cu el a ricibi e contracto aki for di colega Edgard Vrolijk pa e mes por a lesa, el a keda completamente babuca. Pa cuminsa e salario di Richard Arends di acuerdo cu e contracto firma ta na un balor di Afl. 22.375,- pa luna. Vakantieuitkering Afl. 22.375,-. Voorjaars Premie esta Bashi Premie paga na luna di januari ta Afl.3000,-. Najaars Premie, un otro Bashi premie cu mester wordo paga den luna di november pa Richard por pasa un bon Pasco na balor di Afl.3000,-. Telefoontoelage, representatietoelege y brandstoftoelage di Afl. 1100,-. Un auto di trabou na balor di Afl.80.000 florin. Comper no mag di core den cualkier auto. RDA mester paga un pensioen pe na balor di Afl.25.000 pa aña. Un ongevallenlevensverzekering di Afl.750.000,-. Eersteklas na Hospital pa henter famia. Finalmente si un hende kier kibra e contracto aki RDA lo mester paga Richard Arends 5 aña, mas 25 % esta un bunita suma di Afl.2.6 MIYON florin. Wel wel tin hende tin suerte den bida! Pues despues di 1 aña y 9 luna den gobierno ainda tin sorpresanan desagradabel ta sali for di e macutonan bon scondi di Mike Eman. Con Mike Eman kier gaña yora den pueblo cu e ta para na banda di pueblo pasobra e ta sinti e dolor di pueblo mientras den gobierno el a masacra finansas di Aruba redoblando e debe nacional y permiti tur su coleganan minister firma sorto di contractonan monstruoso asina? Nos sa cu Richard Arends ta Mike su wowo preto pero bo no por firma un contracto asina mientras Citgo mes nunca a habri.
Acelera e investigacionnan
Parlamentario Endy Croes ta hopi preocupa cu actitud di AVP den su totalidad. Un partido di “mafiosonan organisa” dirigi pa Mike Eman. AVP a para duro banda di Paul Croes y ata Paul Croes a wordo condena pa corupcion y ta pendiente pa sinta su añanan. AVP y Mike a para duro banda di Benny Sevinger y pronto nos lo cuminsa tende di esaki como cu e bala ta lorando anto cu “speed”. Awor Mike Eman y AVP ta sali defende Richard Arends y den menos di dos dia Richard Arends ta “Dobla” completamente y ta entrega su retiro na RDA fecha 22 di augustus 2019 admitiendo asina cu e tabata tin un contracto valido bon scondi. Finalmente Parlamentario Endy Croes ta termina bisando cu Board di RDA tin trabou pa haci y Parlamento lo bay exigi pa acelera investigacionnan y tur esnan culpabel lo mester carga nan responsabilidad.
Pabien na colega Edgard Vrolijk, presidente di vaste commissie den Parlamento di companianan estatal kende a keda persevera riba CITGO y RDA pa sigui trece bagamunderianan di AVP na luz di dia logrando cu Richard Arends finalmente a retira di su encargo como CFO di RDA.