Diabierna 23 di augustus, directora di Stichting Monumentenfonds Aruba (SMFA), Anne Witsenburg a anuncia cu den luna di september lo inicia cu e proyecto di restauracion di e forno di kalki.
E forno di kalki aki cual ta un di e mihor conservanan den area di Caribe ta actualmente den un mal estado. Algun luna pasa tambe e forno tabata den luz negativo pa un incidente cu a tuma lugar akinan.
Debi na esaki Stichting Monumentenfonds a dicidi di cera e forno su entrada mientras cu ta sigui busca e fondonan pa por restaura esaki debidamente.
Pa basta tempo caba ta buscando fondonan pa por restaura e monumento unico aki. SMFA ta un funadacion cu no ta ricibi subsidio y ta depende di entradanan di huur pa por mantene cada monumento. Debi na cu e obhetonan monumental manera e forno di kalki no por huur nan pa genera entrada e ta haci e posibilidad pa crea fondonan pa restaur’e mas dificil. Pero awe nos ta orguyoso di por anuncia cu nos ta asina leu cu a logra di haya e fondonan necesario pa por restaura e Forno completamente.
E proyecto lo wordo ehecuta pa Parvenir Heritage Restoration & Maintenance Company Ltd.
Nan ta un compania di Trinidad y Tobago cu experticio amplio riba restauracion di monumentonan na diferente paisnan den Caribe. Recientemente tabata na Aruba tambe caminda cu a haci e investigacionnan necesario pa locual ta e materialnan for di cual e forno di kalki ta consisti pa asina por restaura esaki di e forma corecto.
E restauracion lo cuminsa pareu cu curso di tecnicanan tradicional di uzo di kalki cual lo tuma lugar dia 23 pa 27 di September y caminda cu e participantenan lo ta trahando riba e forno di kalki mes.
Despues cu e curso termina, Parvenir lo sigui cu e restauracion cual lo tin un duracion di mas o menos dos luna.
Una bes finalisa e idea ta pa Stichting Rancho por sigui tene e historia di e forno aki bibo y educa e comunidad y bishitantenan tocante e forno di kalki durante nan actividadnan y tournan.
Nos ta spera cu e restauracion di e forno por stimula mas desaroyo den e area y asina trece mas actividadnan y desaroyonan positivo pa e bario di Rancho.
Stichting Monumentenfonds kier gradeci Aruba Bank pa e gran aporte na e proyecto aki cu un donacion di 30 mil florin y tambe na VNO y ministerio di OCW di Hulanda cu a pone fondonan disponibel pa asina por logra restaura e forno di Kalki den Rancho completamente.