Polis patruyando riba baiz den Centro di Cuidad, pa un miho vigilancia y pa motibo di e cruiseshipnan cu tabata mara den Waf di Oranjestad, alabes pa seguridad di e turistanan.
Oranjestad: Diaranson algo pasa di 4’or y mey di atardi, durante cu polis tabata patruyando riba bicicleta den playa, nan ta wordo informa cu un adicto ambulante bisti cu cabey cortico, bisti cu un t shirt blauw y un carson preto ta pasa molestia hende.
Segun e informante e adicto Flint a laba su auto, aparentemente sin su permiso y ta exigiendo 15 florin, Flint a rabia paso e persona no kier a pague e suma aki, pero pa evita mas problema, ela dicidi di duna Flint 15 florin. Enberdad e descripcion cu e persona a duna polis ta cuadra cu esun di Flint.
Na momento cu e agentenan a bay pa atende cu Flint, un turista a acerca polis bisando cu nan a caba di paga Flint,paso ela a exigi 5 dollar for di nan pa staciona riba e parkeerplaats aki. Flint a bisanan cu e ta e parkeerwachter y cu nan mester pague 5 dollar. E agentenan policial a papia duro cu Flint y a exigi pa Flint duna e turista su 5 dollar bek.
Tambe polis a mustra Flint cu estafa hende ta castigabel y cu e mester stop di molestia hende. Polis a exigi Flint pa bandona e parkeerplaats, na prome instante e no kier a bay paso ela bisa polis cu tin chauffeur cu a pague pa cuida nan auto, pero despues di algun intento polis a logra cu Flint a bay for di riba e parkeerplaats.
Segun e agentenan lo ta bon pa bin mas control den e area aki, pa evita e molester di chollers y pa actua mas represivo. Polis ta core cu nan pero ni un ora despues nan tey bek pa sigui pidi placa, laba auto y molestia hendenan cu ta pasa of ta staciona nan auto ey banda.
