Segun Parlamentario Tromp-Lee ora leu leu Mike Eman lanta for di soño y duna un rueda di prensa, ta pasobra ‘su yiunan’ di un manera of otro ta fayando. Mirando cu e no a asumi su responsabilidad pa drenta parlamento, e mester acudi na ruedanan di prensa y cay cada biaha den ripiticion. Pasobra si enberdad e kier a representa su votadornan e lo ta sinta actualmente den Parlamento.
Mike Eman mester realisa cu e no por sigui gaña pueblo mas! En berdad Mike Eman no tin cuer’i cara. Awe e tin e corahe pa bin papia cu tin crisis ariba tur tereno aki na Aruba, cual ta un hipocrecia di marca mayor. Tur crisis aki na Aruba tin nomber y fam: AVP y Mike Eman.
Banda di e crisis financiero y Mega debe laga atras, e crisis cu mas ta haci dolor ta e crisis social. Cada biaha cu Parlamento ricibi un reportahe encuanto e Crisis Plan Social no tin ningun otro conclusion cu por ser saca cu ta e tristo realidad cu Gabinete Mike Eman a faya barbaramente ariba tereno social. Creando un crisis cu no ta un dos tres nos ta bay sali di dje.
Tin biaha ta bon pa refresca su memoria kico nan a ocasiona y a laga atras ariba tereno social:
Un lista di espera di 2 pa 6 luna na Sociale Zaken, otro di mas cu 1 aña na Bureau Sostenemi, di 120 persona na Voogdijraad y mas cu 100 persona na SVGA y asina mi por keda menciona.
Alrededor di 150 caso di violencia domestico pa luna a keda registra pa KPA na aña 2016 sin cu Gobierno un dia a atende cu e situacion aki debidamente. Segun Sociale Zaken un di cada 5 famia aki na Aruba ta biba den pobresa. Un realidad tristo y cu nunca a haya e atencion di Gabinete Mike Eman.
Ora cu Parlamento tabata prepara pa trata presupuesto 2018 nos Fraccion a sinta cu diferente instancia, departamento y fundacionnan cu ta traha den e veld social y nan tabata grita pa atencion, nan tabata grita pa inversion. Mas cu tur cos nan tabata grita pa nos mucha y hobennan, pa nos famianan, pa e decadencia cu nos pais ta aden.
Den diferente rapport di e veld social e crisis social ta keda constata. Awe nos ta cosechando e falta di inversion y atencion den e area social di parti di AVP y Mike Eman. Nan a bay laga atras un keten social tur mal tranca!
P’esey mes durante reunion publico di dia 19 di augustus 2019 mi a enfatisa e echo cu nos no mester lubida nunca loke e gobierno actual a hereda. Nos no por y no mag di lubida e situacion di crisis cu nos pais ta aden. Pasobra contrario na deseo general, deseo di mi y di tur otro persona sinta den Parlamento, den 20 luna di tempo – bou di e condicion financiero conoci – bo no por soluciona e situacion di crisis aki.
Na mes momento mi a enfatisa e realidad cu pueblo ta consciente di e desaster cu Mike Eman y AVP a ocasiona, pero na mes momento mas y mas nan kier tende di zonidonan positivo cu perspectiva pa mehoracion. Y esey ta netamente loke Gabinete Wever-Croes kier logra cu implementacion di e Crisis Plan Social y poniendo e ser humano central.