Home » Parlamentario Edgard Vrolijk (MEP): “Pueblo completo ta wardando e prueba di Richard Arends cu e no a acepta e contracto miyonario”

Parlamentario Edgard Vrolijk (MEP): “Pueblo completo ta wardando e prueba di Richard Arends cu e no a acepta e contracto miyonario”

by Admin
0 comment 46 views

Ayera mi por a scucha un periodista hopi liga na AVP ta trata na hustifica e contracto di e parlamentario di AVP, Richard Arends. Echo ta cu mas nan papia mas nan ta compromete e parlamentario aki. E periodista liga na AVP kier a hustifica e contracto di tempo indefini cu Richard Arends tin. El a compara esaki cu nos cu ta den parlamento bisando cu nos no a laga nos trabao y cu ora nos periodo caba nos lo bay bek nos trabao cual enberdad ta corecto. Esaki ta pasobra nos tur tin un contracto di tempo indefini cu gobierno of fundacion (stichting) y cu pa e periodo di 4 aña nos a pone nos trabao riba inactivo y tambe nos salario. Dia nos bay bek nos lo cobra nos mesun salario cu nos a laga atras.

Ora Richard bay bek RDA…….
Pero Richard Arends ta den mesun posicion cu nos pasobra e tambe tin un contracto indefini y ora su periodo di parlamentario termina e tin di bay bek RDA. E diferencia ta cu nos si a traha y tin cu ya tin 20 aña of mas aña trahando sea pa gobierno of un stichting, mientras cu Richard Arends nunca a eherce e trabao ey. Ora e bay bek RDA como director financiero – sin cu nunca el a traha den e posicion ey pero a fix su mes – el lo bay cobra un dushi salario di Af. 22.375 pa luna, vakantieuitkering tambe di Af. 22.375, Voor en Najaarspremie cada un di Af. 3000, pensioen paga, Af. 1050 na toelage y un auto balora na Af. 80.000 y si e no kier e trabao, mientras cu e no a traha ni un dia, esaki lo costa RDA y Aruba Af. 2.6 miyon florin.
Y manera con e periodista a grita cu nos no lo ta bek mas den parlamento, cu pa mi sigur no ta nada, pasobra mi ta orguyoso di mi trabao y mi salario di docente y ora mi bay bek mi tin di sigui paga e debe crea pa Mike Eman te ora mi baha cu pensioen cu 65 aña, cu Mike Eman hunto cu sindicatonan a cambia. Tambe cu un pensioen miserabel door di e Middelloonregeling y Franchise cu Richard Arends a yuda traha riba esaki, mientras e mes ta baha cu pensioen bon gordo, un pensioen cu RDA (pueblo) a paga pe tin y cu lo ta den careda di 22.375 pa luna.

Comparacion cu Arends su proceso di contratacion
Nos tur pa por a yega nos trabao nos a studia, bay sollicitatiegesprekken, y despues traha a base di contracto defini pa dos aña y tin cu a traha mas aña, y despues pa duna un ehempel, ami como docente e tempo aya mester a solicita pa por haya un contracto pa tempo indefini y directora di SKOA mester a bin observa mi duna les y pa e ora ey mi por a bira vast. Richard Arends al contrario a explota e compania cu su propio consultancy y a saca casi Af. 600.000 den un tempo record y finalmente dia 1 di november 2016 a sinta cu minister Mike de Meza cu e ta traha pe como consultancy, a haya un Golden Handshake pa bira e director financiero di RDA cu un contracto di Af. 22.375 pa luna yena cu beneficionan. Pa e funcion aki no tabatin ningun openbare sollicitatie pero a ser duna di biaha na Richard Adends un contracto indefini cu di biaha Arends a firma y acepta. Tur esnan cu el a menciona ta bay bek nan trabao cu e salario y beneficionan cu nan tabatin y no tin e bunita clausula ey di haya 2.6 miyon florin of e mihor beneficionan cu nunca e tabatin.

Wardando e Prueba
Pueblo completo ta wardando e prueba di Richard Arends cu e no a acepta e contracto aki manera el a expresa. Pero e expresion ey mes ta gañamento pasobra el a firma e contracto y cu esey el a a acepta e funcion. Awo si e kier a sali di e trabao aki, tin un ontslag procedure y Richard Arends mester demostra si el a haci uso di esaki. Si e por trece esaki e storia aki ta caba y nos tur por conclui cu el a kita di trabao pero ta keda e hecho si di con sinberguensa Richard Arends ta di por regla su contracto miyonario. Durante rueda di prensa di AVP mi a kere cu e lo trece padilanti su prueba cu el a kita di trabao pero no a haci esaki y p’esey mi ta laga pa pueblo wak e aanhef cu a cay den mi postbus di notulen di reunion di accionistanan di dia 17 di oktober 2017 y cu mi a manda RDA pa por haci investigacion forensico riba esaki y mi ta laga e aanhef pa pueblo mes les’e cu mi ta cita:
“Het buitengewoon en bijzonder verlof alsmede de ontheffing van verantwoordelijkheden zal duren tot de dag dat het lidmaatschap van de heer mr. Drs Richard A. Arends tot de Staten van Aruba eindigt.” Pues pueblo, saca bo som!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio