Home Politics Durante Reunion Publico: Minister Ruiz-Maduro a duna relato riba e resultado...

Durante Reunion Publico: Minister Ruiz-Maduro a duna relato riba e resultado di e promer mitar di aña  di Presupuesto 2019

SHARE

 

Gobierno a ricibi entrada cu a wordo premira y e gastonan ta bou di control

 

ORANJESTAD – Dialuna despues di merdia Minister di Finansa, Asuntonan Economico y Cultura Sra. mr. Xiomara Ruiz-Maduro tabata den parlamento den un reunion publico hunto cu demas ministernan di Gabinete Wever-Croes. Den su presentacion na parlamento Minister Ruiz-Maduro a duna relato riba e resultado di e promer mita di aña di Presupuesto 2019. Gobierno a ricibi entrada cu a wordo premira y e gastonan ta bou di control segun e presupuesto aproba pa Parlamento di Aruba. E cifranan ta mustra cu e esfuersonan haci di parti Gobierno ta dunando resultado, e deficit ta birando surplus y e tasa di debe ta cuminsa stabilisa. 

E mandatario a sigui trece dilanti cu desde e momento cu a asumi responsabilidad a bin ta traha serio y duro pa por recupera e credibilidad financiero di Pais Aruba. Pueblo no por lubida cu e situacion financiero hereda di Gobierno anterior ta uno caminda e gobernacion anterior na un forma iresponsabel redobla e debe di 2 pa 4 biyon den apenas 8 aña di tempo y esaki ta trece cune un situacion  financiero precario cu no ta facil pa maneha.

 

Danki na e esfuerso y sacrificionan di un y tur tanto gobierno y pueblo esaki ta dunando su frutonan cu  e resultadonan pa prome 6 luna di 2019 ta mustra un surplus di 70,6 miyon. Pues Gobierno ta mantene su mes na e apoderacion duna pa Parlamento di Aruba den Presupuesto 2019. E mandatario a trece dilanti cu nos Pais ta riba bon rumbo y pesey nos no por tuma e risico di desvia di nos plan pa recupera credibilidad financiero. Nos ta realistico den nos trabou y nos ta consciente cu un of mas rapport positivo no ta resolve tur problema, ma sin nan lo ta mas dificil pa nos Pueblo y Pais Aruba. E mandatario ta transparente y a pone tur informacion relevante na disposicion di Parlamento, entre nan, e raportahe di cada Ministerio di januari pa juni 2019, e rapport reciente di Standard and Poor’s, e rapport di IMF y e raportahe di Ministerio di Finansa, Asuntonan Economico y Cultura di januari pa juni 2019.

 

Den menos cu 2 aña den gobernacion Gabinete Wever-Croes pa medio di Minister Ruiz-Maduro responsabel pa e cartera financiero como mandatario responsabel a bin ta demostra karakter y tuma decision y a base di trabaonan duro y dedica ta duna e resultado cu nos Pais Aruba ta den bon rumbo pa un finansa publico manehabel y duradero.