Home Local DAS ta gradici y despedi di colega Marianela ‘Nela’ Haakmeester

DAS ta gradici y despedi di colega Marianela ‘Nela’ Haakmeester

SHARE

ORANJESTAD – “Gratitud ta memoria di nos curason” tabata e palabranan di motivacion y bunita cu Nela a expresa na su coleganan.

Diabierna 16 di augustus ultimo, coleganan di Departamento di Asunto Social (DAS) den un ambiente ameno yena cu gratitud y amor entre colega y famia, a tene un despedida di gradicimento pa nan colega Marianela “Nela” Haakmeester, kende dia 1 di september 2019 lo baha cu VUT.

Nela su carera profesional semper tabata uno peculiar na DAS, Particular pasobra Nela su carera profesional a inicia 37 aña pasa y henter su trayectorio di trabao tabata na DAS.

Antes Gobierno tabata na altura di e studiantenan cu ta terminando nan estudio y Nela hunto cu un otro studiante tabata e unico dos studiantenan di Aruba cu na aña1981 lo a termina nan estudio como trahado social. For di luna di maart na 1981, Nela a wordo poni na altura cu na momento cu e caba cu su estudio, su trabao ta ward’e na Aruba.

Nela a gradua na juni 1981 y oficial a drenta dia 24 di october 1981 den servicio di Gobierno y na aña 1983 Nela a huramenta dilanti Gezaghebber di Aruba como funcionario publico di Pais Aruba. Nela tabata tin yen di momentonan peculiar den su carera profesional. Nela, hunto cu otro dos coleganan Lilain Leest y Mildred Giel mester a pasa un ‘dienst rij-examen’ pa asina nan por a core un dienstwagen di Gobierno.

Como trahado social, Nela a eherce su profesion for di tur oficina y districto di DAS. Nela sempr a dedica su mes na porvenir y bienestar di su clientenan. Pero su dedicacion tambe tabata pa su coleganan. Na diferente ocasion Nela y coleganan a hiba casonan dilanti mesa berde pa bringa pa nan derechonan manera pa nan promocion, pa reduci nan oranan di trabao como trahado social y pa e discrepancia nan cu tabata existi entre un diploma di HTS y HBO. Nela particularmente a bringa pa haya pago igual como un “homber/persona casa” y Nela a gana su caso tambe. Nela su trayectorio y historia como trahado social ta hopi largo sin tin cu menciona tur e casonan social cu e la atende durante su añanan di trabao.

Prome biaha cu Nela a pidi un VUT tabata na aña 2002, pero e organisacion no por a lag’e bay e tempo ey. E mesun aña ey Nela a logra haya un ‘studie opdracht’ pa e bay studia na Hulanda pa ‘V.O. supervisie en coaching’ cual estudio e la termina cu exito y asina bira e prome ‘begeleidingskundige’ aki na Aruba.

Na aña 2006 Nela a regresa Aruba y a cuminsa eherce su funcion nobo como ‘Supervisor/ Begeleidingskundige’ na DAS. E funcion di ‘Begeleidingskundige’ no ta aparece den e rangonan aki na Aruba y aki nan Nela a bringa pa e funcion aki wordo reconoci y balora no solamente pa su persona pero pa futuro graduadonan.

Nela, un guerero di curason y esaki e la demostra cu su fe den e poder di Dios, ora cu na aña 2010 e la haya su mes den un situacion di salud dificil. Nela a sa di lucha y cu su fe grandi e la surpasa esaki y na fin di aña 2012 e la regresa trabao y asina reanuda su profesion como ‘begeleidingskundige’.

Durante e ultimo 7 añanan, Nela a traha como ‘begeleidingskunige’, dunando supervision y coaching no solamente na trahadonan di DAS, pero tambe studiantenan di Universidad di Aruba, dokternan di cas y diferente profesionalnan trahando ariba tereno social. Nela a duna training na diferente organisacionnan di gobierno y no gubernamental. Nela a desaroya ‘training op maat’ pa organisacionnan y team a base di peticionnan cu ta wordo haci. Hopi coleganan tin un laso mas profundo cu Nela cu a forma amistad, durante añanan di trabao.

Nela tambe a traha den ‘Fundacion Conoce pa Construi Futuro’ como boluntario y tabata tin un programa na radio di conscientisacion tocante diferente topico. Nela sigur tin un pida di cada un di e curason di coleganan cu ta labora na DAS.

Manera Nela mes a expresa durante e atardi di su despedida, cu e ta contento y agradecido di por a yega asina leu, a pesar di tur e desafionan cu e por tabatin den su bida y trayectorio di trabao.

Departamento di Asunto Social ta sumamente agradecido pa tur locual Nela a significa pa DAS, otro coleganan den otro organisacion y pa cada un otro persona eyfo. “Nela masha DANKI pa e bunita trabou y amor!”.