Home Politics Resumen di siman di Gabinete Wever-Croes

Resumen di siman di Gabinete Wever-Croes

SHARE

Siman pasa Gobierno di Aruba a presenta e relato financiero di e prome 6 lunanan di aña 2019 pa wordo trata den Parlamento dialuna 19 di augustus. E resultado ta positivo. E desaroyo di gastonan y di entradanan ta segun presupuesto. Esaki ta muestra cu e esfuerso grandi di Gabinete Wever-Croes di aplica un maneho financiero prudente y estricto, ta dunando resultado. E retonan ta keda grandi, sinembargo nos ta riba e bon caminda. IMF y S&P tambe a duna un relato positivo di e maneho financiero di nos pais.

Gobierno di Aruba a informa cu lo bay over na votacion digital, cu ta un forma mas sigur di votacion, mas transparente y den cual ta tene miho cuenta cu privacidad di e ciudadano. Censo ta encarga cu ehecuta e proyecto. Gobierno a comparti cu Parlamento e proposicionnan di cambio di e ley a base di un evaluacion di eleccion 2017, y pronto lo trata esaki cu Parlamento.

Prome Minister a anuncia cu frontera cu Venezuela ta keda cera. Esaki debi cu e situacion na Venezuela ta sigui hopi tenso. En bista di e sanccionnan nobo di Merca contra Venezuela, ta ser spera un exodo mas grandi di persona di Venezuela.

Bureau Integriteit Aruba a cuminsa un campaña di conscientisacion di Integridad. Esaki ta un campaña cu lo pasa na tur medionan di comunicacion pa aumenta conscientisacion kico ta comportacion integro y kico no. Hunto nos por logra Integridad.

Minister President y Minister di Finansa a continua cu e trabounan di Reforma Fiscal, trahando riba un sistema di Impuesto mas husto, sensiyo y transparente.

Minister President a bishita Scol Basico Cacique Macuarima na Santa Cruz pa mira con e proyecto di Innovacion ta avansando. Ya tur e klasnan tin e smart board “C touch” y e klasnan tin airco. E proyecto lo wordo finalisa pronto cu instalacion di demas ekipo. E docente y alumnonan ta hopi contento cu e avansenan.

Minister di Asunto Social y Labor a reuni cu mediador internacional Sra. Barbara Abdoelkariem kende ta registra y reconoci pa Mediator Federatie Nederland.

Pa conmemora e Dia Internacional di Hoben e mandatario a ricibi ATHA – Asociacion di Trabou di Hubentud di Aruba. For di man di e Dirigentenan e Mandatario a ricibi un raportahe presenta na Ginebra Suisa. Pa prome biaha den historia cu Aruba ta presenta un raportahe di e indole aki na Nacionnan Uni. Minister Glenbert Croes a gradici ATHA pa e trabou indispensabel na bienestar di nos hobennan.

Minister Glenbert Croes cumpliendo cu transparencia, a duna un raportahe di e Sociaal Crisisplan na Gobernador di Aruba. E mandatario a wordo acompaña pa Sra. Glenda Hernandez di Departamento di Asunto Social, Sr. Derrick Werleman di Departamento di Finanzas y Sra. Omaira Lares di Departamento di Recurso Humano. Sra. Hernandez a duna un estado di cuenta di e inplementacion di e plan. Sr. Werleman a raporta riba e aspecto financiero y Sra. Lares riba e proceso di adkisicion di profesionalnan cu lo mester percura pa ehecucion di e SCP.

SEPPA y e empleadonan di Tra’i Merdia a bin manifesta nan incertidumbre na diferente ocasion e siman cu a pasa. Tur biaha Minister Glenbert Croes a ricibi y reuni cu e Sindicato y su miembronan.

Un raportahe di e Crisisplan Social a keda presenta na Sr. Erwin Arkenbout, Sr. David Abrahams y Sr. Pim van Loon, representantenan di VNO. A splica na VNO e importancia di existencia di SCP, e desaroyo te cu awo y kico ta tur locual cu a logra te awo cu SCP na bienestar di nos pueblo, pa asina crea un alivio den e presion social cu Aruba ta experenciando.

A ricibi for di man di honorable miembro di Parlamento Sr. Edgar Vrolijk e Business Plan pa loke mester bira e Centro di Bario Santa Cruz, cu por conta cu apoyo y sosten di Minister Glenbert Croes pa cu su realisacion.

Cu hopi orguyo Minister Glenbert Croes a ricibi e traspaso oficial di Tra’i Merdia. E mandatario diabierna atardi 5PM a reuni cu SEPPA y e representantenan pa prome biaha oficialmente como e Minister encarga cu Tra’i Merdia. Hopi emocion combina cu animo pa cuminsa cu un capitulo nobo pa Tra’i merdia. Desde 16 di augustus ‘buitenschoolse opvang’ cu ta inclui Tra’i Merdia, Nos Atardi y Crechenan ta resorta bou di Ministerio di Asunto Social y Labor.

Minister di Infrastructura a haci cambionan grandi riba proyecto Watty Vos Blvd, cual a duna resultado sumamente positivo. Adaptacionnan grandi a wordo haci conhuntamente cu e contratista ehecutando e trabou, despues cu mester a cera e rotonde di Cumana fin di 2018 pa motibo di gran cantidad di awa cu a keda para na e sitio. E siman aki a constata cu e sistema di drenahe nobo aki a traha manera cu a spera y asina a haci varios adaptacion mas na e proyecto aki.

Minister di Infrastructura Otmar Oduber a atende cu e tema di presunto iregularidad tumando luga cu tereno. Pa locual ta e caso aki a enfatisa cu ningun di e personanan envolvi den e acusasionnan aki ta traha pa Gobierno y no tin ningun vinculo di trabou cu nan tampoco. A instrui Director di DIP pa no solamente haci un investigacion interno mas profundo na DIP, pero tambe a instrui e Director di DIP pa entrega un keho formal na Ministerio Publico pa posibel soborno y/of estafa

E maneho nobo di tereno transparente introduci den Gabinete Wever Croes ta encera cu personanan ta bin na remarke pa tereno sin discriminacion. Tur persona cu entrega peticion na DIP ta yega na turno a base di First In First Out (FIFO), ta trata peticionnan di mas bieu te mas recien. Esaki a bin ta haciendo, atendiendo cu peticionnan di 1994 pa cual por bisa cu e aña aki ta yega 2010! (fin di luna di augustus lo ta atendiendo peticionnan di 2008-2009).

Bureau City Inspector ta sera un otro siman sumamente druk y cu hopi exito danki na nos comunidad cu ta raporta riba www.infrAruba.com of ta yama BCI na 5829777.
Un siman caminda a kita 9 Auto den mal estado para riba caminda publico. A papia cu doño di garashi pa por ruimop e auto bieuw, tambe a logra bishita y ruim op 2 rooi y un Dam cu tabatin hopi sushi cu por stroba e awa di pasa

Serlimar su campaña di #TurTurCuSerlimar ta continua! E campaña a cuminsa 31 juli y lo sigui te ora cu termina cu henter Aruba. Meta principal di e campaña ta pa Serlimar reemplasa containernan kibra pa containernan nobo den tur districto. Algun bario cu Serlimar a bishita recientemente ta: Jan Flemming, Macuarima, Papilon, sigui pa Turibana, Kamay, Saliña Cerca, Rooi Santo y West Punt. Di e forma aki Serlimar a sigui cu su campaña cambiando containernan bieu pa nobo.

Despues cu American Airlines a anuncia cu lo aumenta su capacidad di asiento for di vuelonan for di La Guardia (New York) e siman aki Westjet a anuncia cu lo aumenta su frecuencia y cantidad di asiento for di Toronto, Canada.

Turismo ta sigui crece y ta keda e driver principal di nos economia. Den luna di juli e grado di ocupacion a subi cu 3 porciento compara cu juli 2018 y cu esaki un di e grado di ocupacionnan mas halto den henter Caribe cu 88.7%. Aruba ya no conoce low season mas mirando e indicadornan, segun e Minister Dangui Oduber. Banda di e grado di ocupacion e REV PAR den luna di juli a conoce un crecemento di 8.2% den comparacion cu luna di juli 2018. E REV PAR den juli 2019 tabata $219.51. E REV PAR ta un indicador sumamente imporatante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi.

ATA a entrega e cuentanan anual di aña 2018 na Minister Dangui Oduber. Aña 2018 por wordo considera un di e miho añanan den historia di turismo di nos pais. Tur e indicadornan ta demostra esaki.

Minister Dangui Oduber a reuni cu San Nicolas Business Association den cuardo di cooperacion pa desaroyo na San Nicolas. Minister Dangui Oduber a anuncia un bunita proyecto na Baby Beach, e visitor informacion center na San Nicolas ta operacional, piernan nan Rodgers Beach ta wordo drecha y asina tin un cantidad di proyecto pa San Nicolas. Hunto cu coleganan di Gabinete Wever Croes lo duna San Nicolas e atencion cu e merece.

Minister di Salubridad y Deporte Sr. Dangui Oduber a haci apertura di e Workshop “Exercise is Medicine”. E workshop aki ta un iniciativa di Fundacion Movimento ta Bida y “Transition to Health” conhuntamente cu Ministerio di Salubridad Publico.
E workshop aki su meta ta pa enfoca riba e importancia y beneficio di ehercicio como metodo pa preveni y combati malesanan manera diabietes, malesanan di riñon, malesanan cardiovascular, hipertension y malesanan mental. Dr. Duperly y dr. Mahecha ambos internista y investigador specialisa riba tereno di actividad fisico y fundadornan di “Exercise is Medicine”. E workshop aki su meta ta pa duna guia y standaard na profesionalnan riba e tereno di salud pa prescribi actividad fisico na nan patientnan y/of clientenan.
“Exercise is Medicine” ta cuadra cu e vision di Minister Oduber caminda promove deporte y actividad físico ta forma gran parti di e maneho nacional integral pa cu prevencion di malesanan no comunicativo cual lo wordo ehecuta na jan 2020. Cu e vision aki Minister Oduber kier mehora salud di nos hendenan y hisa calidad di bida.

Minister Dangui Oduber a soluciona e problema di werkruimte pa JGZ pa dentro di algun siman tin un espacio nobo pa nan por haci nan trabounan.

Extra medidanan di siguridad a wordo poni in place pa reenforsa KIA. Lo busca un sistema di tracking di prisonero. Ministerio di Husticia conhuntamente cu KPA, KIA y CEA a pone extra medida di siguridad in place na KIA. Entre otro a stationa e mobile Command Center di KPA cu tin sistema adiconal di camera sofistica, a pone patruyanan di KPA adicional y light towers pa mas iluminacion. Tambe lo pone mas personal y patruya disponibel y intensifica cooperacion den cuadro di vigilancia y siguridad, cual lo wordo coordina conhuntamente cu KPA y NCTVI (stelsel bewaken en beveiligen van vitale infrastructuur). Ademas a tene controlnan severo pa detecta iregularidad.

Dialuna lo cuminsa un proceso di Request Expression of Interest adicional pa haya un sistema di tracking di prisonero conoci como “Inmate tracking system”, cual lo yuda monitoria e prisoneronan via un sistema technologico avansa cu ta wordo uza na Merca y rond mundo. Cu un sistema asina lo por sa constantemente unda un prisonero ta.

Mientrastanto e procesonan pa renoba e infrastructura deteriora lo sigui aceleradamente, mientras ta sigui encamina e proceso inicia pa por yega na un facilidad nobo pa KIA.

Diadomingo 11 di augustus ultimo a tuma luga e grandioso final di e proyecto Gang di Arte di Departamento di Cultura y Dream Dare Do di Popcorn Dancers na Cas di Cultura. Tabata un anochi dibertido cu hopi energia di e hobennan talentoso presentando diferente baile y actuacion cu e hobennan a siña durante e tayernan y cu a culmina den e musical cu e tema di “Movies & Musical – Action.” E cinco gruponan cu a presenta ta: The Lion King, Highschool Musical, Aladdin ( a bay cu e premio di tercer luga), The Greatest Showman (a bay cu e premio di segundo luga), SantAna (cu a bay cu e premio mas creativo y ganado absoluto). Masha pabien tur participante y ganadonan y danki na Departamento di Cultura, Popcorn Club Aruba & Popcorn Dancers, UNOCA, Scol di Arte, Maria College, tur boluntario y publico cu a haci e anochi aki exitoso.

Aruba su 25 Florin a wordo nomina pa placa di papel di 2019 pa International Bank Note Society pa “Banknote of the Year 2019 award” hunto cu e 5 pound di Northern Ireland y e 1000 Franc di Switzerland. Un pabien na Pueblo di Aruba cu e nominacion aki. Dia 31 di januari 2020 lo ta e ultimo dia cu por haci nominacion pa e premio aki y na April 2020 e ganado lo wordo anuncia.

E siman aki e reunion di trabounan riba e tereno di Reforma Fiscal a sigui pa asina Aruba por yega na un sistema di impuesto mas simpel y mas husto. E Reforma Fiscal ta consisti den 4 fase y awor aki ta trahando pa por concretisa fase 2 cu lo mester drenta na vigor na januari 2020.

Diabierna ultimo Minister Xiomara Ruiz-Maduro a reuni cu ehecutivonan di Caribbean Financial Group kende ta e compania madre di Island Finance na Aruba cu ta specialisa den duna credito na esnan cu tin aseso limita na fiansanan na banco. Durante e reunion e ehecutivonan a amplia riba e importancia di inclusion financiero y e rol cu Island Finance a bin ta haci den esaki bayendo pa cumpli 40 aña cu nan ta estableci na Aruba. Nan a informa tambe cu pronto Island Finance lo conta cu un surcusal na Savaneta pa asina por brinda un miho servicio na clientenan di P’ariba di Brug.

Gabinete Wever-Croes a inverti 400 mil florin pa modernisa e Direccion di Asuntonan di Telecomunicacion (DTZ). Teniendo na cuenta cu DTZ tabata un departamento cu a wordo poni den cashi di olvido pa hopi aña, Minister Romero a pone como un di su metanan inmediato pa modernisa e dienst aki. DTZ ta un departamento di importancia vital den e mundo moderno den cual nos ta bibando awendia.

Arubus NV a haya e prome grupo di 8 bus di un flota di 30 cu ta na caminda pa Aruba. Di e manera aki Minister Chris Romero ta mantene su promesa pa rehubenece e flota actual di e compania estatal di transporte publico. E busnan nobo ta ekipa cu un motor cu tecnologia EURO 5, cu ta “mileuvriendelijk”, pero tambe ta ekipa cu airco, WiFi y USB charging ports pa asina brinda un servicio extra na e usuarionan.

Minister OWD Rudy Lampe a habri e siman cu Tesla University cu a scoge Aruba pa establece un branch di formacion tecnico di adultonan hoben.

A cera e siman cu e competencia di botonan miniatura den cuadro di Internacional Regatta Aruba, organisa pa stichting Rancho, apoya pa UNESCO, cu ta rescata tradicion valioso di humanidad.

Siman pasa tabata tin apertura di aña escolar nobo 2019-2020, unda miles di alumno y maestro a inicia e programa di estudio asina importante pa nos futuro generacionnan. Gabinete Wever-Croes ta desea tur alumno y docente hopi exito den e aña escolar nobo.