Home » Presidente di MEP, Hendrik Tevreden: ARUBA TA INVITA PA INAUGURA AVENIDA NELSON ORLANDO ODUBER UN RECONOCIMENTO NA UN GRAN POLITICO Y GOBERNANTE ARUBANO

Presidente di MEP, Hendrik Tevreden: ARUBA TA INVITA PA INAUGURA AVENIDA NELSON ORLANDO ODUBER UN RECONOCIMENTO NA UN GRAN POLITICO Y GOBERNANTE ARUBANO

by Admin
0 comment 51 views

Partido MEP a repasa por medio di su 3 articulonan un parti di e trayectoria impresionante di nos lider honorario sr. Nelson O. Oduber relaciona cu cambio di “Sasakiweg” den “Avenida Nelson Orlando Oduber”. Y awe dialuna atardi ta e dia cu esaki lo wordo concretisa.

Sr. Nelson O. Oduber, un lider cu keto bay ta den curason di partido MEP y pueblo di Aruba, a marca pasonan historico na bienestar di nos Pais y su nomber sigur lo keda graba den e historia di nos partido y Pais.
Di periodonan dificil pa momentonan di gloria semper como lider el a goberna manteniendo un curso recto. Y e balornan y actitud aki a resulta den un carera exitoso pa mas di tres decada (36 aña). Aruba a conoce hopi politico, pero poco tin e trayectoria impresionante manera esun di lider honorario di MEP sr. Nelson O. Oduber. Di 1975 cu el a dibuta pa prome bes riba lista di e prestigioso partido MEP te cu 2011 cu el a retira, el a demostra di a pone Aruba prome den tur decision cu el a tuma. Y Aruba por a disfruta grandemente di e beneficionan y e sacrificionan cu el a haci como gobernante.

Respet
Den bida bo por tin hopi hende cu lo gusta bo y otronan cu no. Pero mas importante ta, cu nan ta respeta bo. Y den Reino Hulandes su totalidad, e respet pa sr. Nelson O. Oduber te cu awe ta intacto, apesar di tur otro pensamento of ideologia cu cada un tin. Sr. Nelson O. Oduber a modela e palabra integridad na gran forma y a retira di politica cu un record intachabel.
Awe como presidente di MEP mi ta sinti mi orguyoso di mira su nomber wordo lanta y pa mira e reconecimento cu e ta ricibi siendo na bida. P’esey nos ta haci un yamada na nos sostenedornan pa bini presencia e momento aki hunto cu Nel, su famia y partido MEP.

Awe nos ta mira bek un rato den historia pa corda cu na 1983 e personahe aki a percura pa introduci e plan di infrastructura turistico cu a amplia caminda pa mas Arubiano por ta mas cerca di e economia turistico cu nan negoshinan. Manera un lider cu ta percura pa esnan chikito den comunidad tin di actua. Hopi comerciante te cu awe ta agradecido cu e decision aki, pasobra e tawata un decision na bienestar di e homber chikito cu por a crece financieramente fuerte na su mes Pais.

P’esey awe den nomber di nos partido Movimiento Electoral di Pueblo nos kier manda un felicitacion na sr. Nelson O. Oduber, y su famia cu e reconocimento aki. Y alabes gradiciele un bes mas pa e sacrificio y esfuerso cu el a brinda nos partido y e comunidad di Aruba en general, pa tur e añanan cu el a sirbi nos como gobernante di e Pais aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio