Parke Nacional Arikok: Diadomingo den careda di 8’or y 15 di anochi ta drenta un yamada na centraal di polis, e persona ta splica polis cu su persona hunto cu un amigo a bay den Parke Arikok y na altura di Rancho Daimari nan a mira un pareha Turista, e pareha a laga nan auto un Hyundai Accent blanco staciona den area di Rancho Daimari y despues a lo a cana bay Conchi.
Pa mas o menos 7’or y 35 di anochi, e persona cu su amigo a regresa y a bin topa cu e auto di e turistanan ainda para mesun caminda, ya tabata scur caba y mesora nan a dicidi di bati alarma.
Pa motibo cu no tabata comunicacion di telefon den e area di Rancho Daimari, nan a dicidi di core bay un poco mas pabou, pa asina por a yama polis.
Mesora a manda un patruya na e sitio y na yegada nan a bin topa enberdad cu un Hyundai Accent. Mirando cu e caminda tabata hopi malo, nan no por a sigui core y nan mester a pasa cu un pickup via e entrada di Parke Arikok.
E helicopter tambe mesora a wordo activa y a cuminsa cu un buskeda pa e dos turistanan cu lo tabata perdi den Parke Arikok.
Na dado momento e patruya di polis a bin topa cu e dos turistanan perdi, ambos tabata bon y mesora a cancela e ayudo di e helicopter.