Mi a keda sorprendi cu ni na lugar di sosiego di defuntonan cu ta santana, no ta ser respeta mas pa Mike Eman ni pa partido AVP. Hasta den santana Mike Eman a demostra envidia y zelos contra Nelson Oduber cu den su carera politico a demostra di tabata un politico fuerte y para den su sapato y kende a percura pa stabilidad financiero di nos pais hunto cu desaroyo economico y a percura pa semper nos por a ser respeta den Reino. Y e manera con Mike Eman a expresa su mes contra Nelson Oduber y purba na halsa su ruman Henny Eman y trata di compara su persona cu Nelson Oduber, hamas por tin un comparacion.
Escandalo y consecuencianan pa pueblo
Mi ta di acuerdo si cu lo cual Mike Eman a expresa di su ruman, esta cu su persona a logra hopi, esey ta berdad. Entre otro el a percura pa pueblo por a paga hopi na su blunder pa tene man cu mafiosonan Italiano den proyecto Beta Hotel y cu Sace finalmente a costa pueblo unda cu pa 15 aña largo pueblo mester a paga 10 miyon anualmente y unda cu na maart 2018 e ultimo pago a ser haci (y tambe na comienso a paga 100 miyon cash) pa asina pueblo por a sali menos golpia di un deal cu mafiosonan di parti su ruman. E mesun ruman aki tambe a causa mas desaster den e proyecto di Racetrack, cu ni a pone un piedra, pero cu a costa e pueblo miyones, sin conta e escandalonan cu hendenan di baho mundo (‘la luna que brilla’) y sin lubida e famoso matanan di coco di Radisson y asina nos por menciona mas escandalonan di Henny Eman, compara cu Nelson Oduber cu hamas por a hay’e den ningun tipo di escandalo, pero alcontrario a percura pa e mesun hotel den ruina laga atras y cu a costa pueblo den careda di 300 miyon, por a ser transforma awe den e Marriott bunita cu pueblo por wak y unda cu den historia semper Nelson Oduber mester a bin drecha locual Henny Eman a destrui.
Zelos di Mike Eman
Bo ta sinti cu Mike Eman kier pa su ruman of su persona haya un reconocemento y un lugar den historia. Pero Mike Eman mester ta orguyoso cu e tin un lugar caba den historia di Aruba como e unico Promer Minister cu por a redobla nos debe nacional den 8 aña di tempo y a laga esaki cu orguyo pa pueblo paga y awe pueblo ta paga e maneho orguyoso aki di Mike Eman, mientras e mes henter dia ta drumi den airco den su super MEGA PENTHOUSE y leu leu ta sali manera awo pa stroba hasta e defuntonan di sosega. Banda di esaki Mike Eman ta conoci caba den Reino como e unico Promer minister bipolar y tienermeisje (ta Hulanda a dun’e e titulo aki). Pero si ta un Avenida Mike Eman kier na su nomber, mi ta kere cu e minister di infrastructura Otmar Oduber mester percura pa e caya net pariba di Gobernador cu ta pasa dilanti di Fort Zoutman ser cambia den Avenida Ensure y Welga di Hamber na honor di Mike Eman pasobra el a percura pa nos haya supervision financiero pa su mal maneho. Y alabes por percura pa pone banda pabao unda tin un lugar ainda, un monumento cu nos por yama MEGA DEBE y cu sigur pueblo por pasa cada bes y recorda cu pa 30 aña largo nan tin di bay paga e debe crea door di Mike Eman, anto cu mega orguyo, unda mientras e homber chikito tin di soda pa paga esaki, Mike Eman ta drumi dushi den su MEGA PENTHOUSE y wak su calender di vakantie pa bay disfruta di locual el a saca di cada homber chikito riba e país aki.